170. Catholic Pawlpi le Khristian a silo mi biaknak pawlih pehzom awk daan cu ziang tin si?
Milai pakhat le pakhat lakah pehtlaih awknak a um a si. Ziangruangah tile milai ih hramthawhnak le cemnetnak cu pakhat a si. Catholic Pawlpi cu Pathian hnen in a ra ih biaknak dang sungih a um mi thudik le thuhman pohpoh cu a cohlang ih a nemhnget a si. Cuih thuhman in Thuthangṭha cohlang theinak dingah lamzin ṭha a sial thei. Cu lawng siloin leithlun minung pawl Khrih ih Pawlpi sungah hmunkhat ih um theinak ding khal ah a cang thei a si.
171. Pawlpi ih lenglamah rundamnak a um lo timi cu ziang ti can a si?
Rundamnak cu Hotu a si mi Khrih in a ruangpi a si mi Pawlpi hnen ihsin a pek tinak a si. Curuangah Pawlpi cu Khrih in a din ih rundamnak ngahnak ding hrangah a ṭul a si, ti a thei nan Pawlpi sungih a lut duh lo tu le Pawlpi sungih a um bet duh lo tu pawl cu rundam an si lo ding. Asinan, maih mawhnak ruangah siloin, Khrih ih Thuthangṭha le Pawlpi thei lo tu hrek khat an um. Zaangfahnak ruangin Pathian a hawl tu pawl cu kumkhua nunnak an ngah thei a si.
172. Ziangruangah Pawlpi in Thuthangṭha cu leithlun khua zakip ah a phuang?
Pawlpi in leitlun hmun zakip ah Thuthangṭha a puan a ṭul a si. Ziangah tile Khrih ih thu pek mi a si: “Leitlun miphun zakip hnenah va feh uh la Pa le Fapa le Thiang Thlarau hmin in tihnimnak nan pe dingih ka dungthlun tu ah va cang ter uh” (Mt 28:19). Hi thuthangṭha phuang dingih thupeknak ih hrampi cu kumkhua ih a hmun mi Pathian ih duhdawtnak ah a um. Pathian in “mi hmuahhmuah run dingin le thudik thuhman thei dingin a duh a si” (1 Tim 2:4).
173. Ziangruangah Pawlpi cu thuthangṭha phuangtu a si kan ti?
Pawlpi in Khrih ih rundamnak hnaṭuan cu Thiang Thlarau in lam hruainak in ziangtik hmanah cawl loin a ṭuan a si. Zumtu pawl in mi hmuahhmuah hnenah Thuthangṭha phuan ding a si. Cun harsatnak a phunphun tuar dingin siseh Pathian hrangah nunnak pek tiang in siseh timtuah le ralring cia ih um ding a si.
174. Ziangruangah Pawlpi cu dungthluntu pawl thawn pehzom awknak a nei kan ti thei?
Pawlpi cu Dungthluntu pawl thawn pehzom awknak a nei a si. Ziangah tile Pawlpi cu Dungthluntu pawl parih din mi a si (Eph 2:20). Pawlpi in Dungthluntu pawl ih zirh mi pehzom in a zirh sin a si. Dungthluntu pawl in an maih can ai sawngtu bishop pawl le Piter ih can ai awh tu Pope pa thawn Pawlpi cu thu a zirh, a thianghlim ter ih lamzin a hruai a si.
175. Dungthluntu pawl ih thuthangṭha phuan mi cu ziang vek in Pawlpi ih Thuthangṭha phuan mi ah a tel?
“Dungthluntu” timi ṭongfangih ti can cu “thlah mi” tinak a si. Pa Pathian ih thlah mi Jesuh in dungthluntu hleihnih cu a hnenah a ko ih thihnak ihsin a Thawhsalnak phuang dingin le a Pawlpi ih hrampi si dingin Dungthluntu ṭuanvo a pek hai. Jesuh in amaih rundamnak hnaṭuan pehzom dingin Dungthlun tu pawl thu a pek. Cun Jesuh in a dungthlun tu pawl hnen ah hi tin a sim: “Pa ih i thlah bangin kei khal ka lo thlah a si” (Jn 20:21). Cun, leitlun cem tiangin nan hnenah ka lo um pi ding a si, tiah thu a kam.
176. Dungthluntu pawl thawn pehzomnak timi cu ziangti can a si?
Dungthluntu thawn pehzom awknak kan timi cu Dungthluntu pawl ih can ai awh tu bishop pawl hnenah thuthangṭha phuannak le Dungthluntu pawl ih thil tuah theinak huham cu siangbawi cannak sacrament ihsin pek sin mi a si. Himi pehzom awknak ruangin Pawlpi cu a maih hramthoknak thawn cat loin pehzom awknak a nei ringring a si. Pawlpi in tuini tiang cat loin Khrih ih thuthangṭha karh zai dingin leithlun ah hna a ṭuan ringring a si.
