June 17 ni Tlawngkai nithum ni mipi a ton theh ah Pope Leo in remdaihnak hrang a dilbet ih American le Iran karlak ih remdaihnak hrang lungkimnak an ngah nak kha cohlangin a rak lawm ih nunnak cemtu pawl, siatsuah mi le harsatnak buainak a cang rero lai mi Ukraine ralbuainak khal a thin a phan zet thu a rak sim.

St.Peter tualrawn ah a rakhawm awtu mipi thawngtampi pawl hmaiah Pope in Pakistan ih a remsaknak ruangah a cang mi “Islamabad Memorandum” kha a rak lawm. Cui lungkimnak cu June 16 ni ah Luceme ah lethmat tthutnak an nei dingih thinsau lungfual mi thureltlangnak pawl ih thazaang laknak ih ngah mi pakhat a sithu a rak sim.

Cuihlei ah an mah thawn pehpar mi pawlkom pawl naihniam aw dingah a bawm tu ram pawl kha an parah a lung a awithu a sim ih hi lungkim tlangnak cu nisuahnak a laifannak hmun ih remdaihnak le hmunhngetnak lamah a fehpi mi a ngaingai ih tuah mi kekarnak si dingah a ruah san thu a rak langter.

Hi lungkim tlangnak cu khat le khat zumawknak, humhimnak le hmunhngetnak kha a khohter ih miphun pawl karlakah thureltlangnak le tuah tlangnak lamzin pawl kha on sak thei hram seh” tiah Pope in a rak sim.

Ukraine ralbuianak thawn pehparin kum li a rei mi ralbuainak cu pehbet in a cang rero lai ih minung nunnak tampi a sun ih hleiah biaknak lam le nunphung ih thil mankhung pawl khal siatsuah an tuart hu riahsia zet in a rak sim.

Pope Leo in nunnak cemtu pawl ih sungkhat pawl, hliamtuar tu pawl le hmuhsuam tuartu pawl karlakah minung nunnak kha humhim dingah raltha zet in pehbet in hna a tuan tu pawl thawn nai zet in a um thu a langter ih ramtin kiangkap ah remdaihnak hrang tamdeuh in zuam dingah le zumtu pawl zete khal remdaihnak hrang tamdeuh in thlacam cio dingah a rak forhfial.

Lungrual in thurel tlangnak lamzin pawl kha on sak dingah, huatawknak kha hrial dingah le remdaihnak kha kauter dingah Pathian hnenah thlacam uh si” tiah Pope in zaangfah a rak dil. Hi mi cu Vatican thuthangin kan ngan mi asi.