Zamrang zet ih zangfah ka lo dil duh mi cu leilungpi ih hmailam caan an lang ter nak ah ziangvek in kan tuah le a tha ti mi kha a thar in rel khawm nak nei dingah keimah dinhmun in thupi zet in ka lo sawm duh asi. Kiangkap siatral nak kha kan zaten kan tuar ih hi vek thil can nak ruangih a bul hram bik cu kan mah minung pawl kan si ih hi harsat nak a tuar rero tu kan mah pawl ih vansang tuar nak thu khal asi ruangah hi thurel khawm nak ah miphun tin kim ih minung pawl tel dingah a thupi asi.

Leilung pumpuluk tah nak in kiangkap kilhim nak thawn pehpar ih cangvaih nak cu nasa zet in a thangso ih hi buai nak kha mitin in theithiam dingih simfiang nak caan pawl a tawlrel tu pawlkom khal tamzet an suak asi.

A sinan riahsiatza zet asi mi pakhat cu kiangkap buai nak pawl kha dingfel zet ih simfiang dingin zuam rero nak pawl cu thazang tha pawl ih nahsuah nak tuar rero ruangah le hi hnatuan nak par ih ngaihsak um lo nak pawl ruangah a rahsuak mi a mal thu kha kan hmu asi.

Hi kiangkap kilkhawi nak hnatuan par ih nahsuah nak lungput cu zumtu Khrihfa pawl lak khal ah a phunphun in kan hmu asi. hi buaibai nak a um lo rori ti ih a el tu paw, hi buai nak cu kan mah thawn a pehpar aw lo ti ih a ti tu paw, hi buainak relfiang dingah kan dinhmun in zianghman kan ti thei lo ti ih mah le vanthat nak zum ih sun nak a petu pawl le science thanso nak san ah thil ziangkim kha science in an relfiang thei tin an ti ih mitsing ih a zum tu tivek pawl an um kha kan hmu thei asi.

Hi buaibai nak simfiang nak hrangah leilungpumpi tah nak ih minung zate ih lungrual nak kha a thar in kan tul asi. Pathian  ih sersiam mi rannung pawl kha dik lo zawng ih hman nak ruangih a ra cang mi siat nak pawl kha remtha sal dingah minung zate in pakhat cio ih kan thil ti thei nak pawl kha hmangin, tuahtlang a tul thu, thlanglam Africa ram ih Bishop pawl ih tonkhawm nak ah an rak suah asi.

Pathian ih sersiam mi thil pawl kha kilkhawi hnatuan nak ah kan zaten kan nungphung ih zir in, hmuhton nak ih zir in, tithei nak le tuahtlang nak ih zir in Pathian ih hmanrua si in kan tuantlang ding asi.

Laudato Si’ no 14