Pope Leo XIV in Angelus thlacamnak ah thumkom Pathian sungah kan inn kan hmu thei tiah sim. (May 31, 2026)
Vatican ih thumkom Pathian pakhat puai ni Zarhpi ni Angelus thlacamnak ah a rak khawmaw tu zumtu pawl hnen Pope Leo in thumkom Pathian pakhat ih sinak cu “ rei lo te ih thinlung hmun hnget lo ih a um thei theu mi kan thinlung kha daihnak in pe” tiah a rak sim.
Thumkom Pathian ih a thuk zet mi thuthup kha ruah phah in Khrih Jesuh thawngin kan hnenih in pek mi Pathian ih nunram in a thok mi kan mai zumnak lamtluanah ruat sal dingah caantha a sithu a rak sim.
Pope Leo in hi nunram cu “kan mah in a hnenah pan dingin thatho zet in a cem ni um lo mi duhdawtnak le zumnak thawn pehpar mi pehtlaihawknak nunram” a si thu a rak sim. Pa Pathian le fapa Pathian kha a komaw ter mi thiangthlarau Pathian cu kan thinlung sungah in ret sak cia thu khal a rak sim. Curuangah Pawlpi cu “Pehtlaihawknak ih Sacrament pakhat” ah a cangih vancung le leilung tonawknak duhdawtnak le nunram ih tonawknak hmun ah a can thu a rak sim.
Tuisun ih Gospel Thuthangtha kha ruat phah in Pope Leo XIV in Nicodemus ih thu kha a rak sim. Nicodemus cu Jesuh kha a rak sunloih tukih Jesuh kha zo a sithu tam deuh in thei a duh ko nan midang pawl ih hmuh kha a phang ih zanah Jesuh hnenah feh in a rak tong thu Pope in thupit in a rak sim.
Asinan Jesuh in Nicodemus cu a rak cohlang ih mi upa dinhmun in a thar in hrinsal a si thei thu a sim tikah Nicodemus cu a rak mangbang ter. Cui an tonawknak in Nicodemus cu Pathian in a nunram a thleng ter thei thu a rak thei.
Jesuh in Thiangthlarau thu a sim tikah Nicodemus ih thinlungsung ih thimnak cu tleunak in a rak khat. Cuitleunak in tui ni Thomkom Pathian puaini ah Pawlpi zaten in theih ter mi thutak khal a si.
Cui thutak ah “Pathian cu leitlun a duhdawt tuk ruangah a mai neihsun fapa pakhat kha a rak pek. Curuangah a mah a zumtu pawl cu siatral lo in kumkhua nunnak an ngah ding asi. (Jn 3:16) ah kan hmu thei. Cuihleiah Pathian cu a fapa kha leitlun kha mawhphurh dingah silo in a mah thawngin ruun dingah leitlun ah a run thlah a si” Jn 3:17 khal ah kan hmu thei a si.
Pope Leo in thumkom Pathian, Pa, Fapa le Thiangthlarau ih a thuk mi thuthup sungah “kanmah pawl cu inn sungih a um mi vek kan si” tiah a rak sim. Nicodemus cu Jesuh ih hmai ih a um lai vek kan si. Pathian ih nunram in minung pawl kha a hip thei ih thei dingah paih a um zet. Cu mi cu “a hmun lo mi kan thinlung kha daihnak a pek” tiah a rak sim. Cuihleiah Thiangthlarau ih lungawinak sungah kan mah pawl cu kan ulenau pawl thawn kan tong aw thei tiah a rak sim.
Pope Leo in “Hi Thiangthlarau a cohlang lo tu pawl cu beidon riahsiatnak sungah an tangih thinlung nuamnak nei lo ih zamrang ten an tar thei theu” tiah a rak sim. Tuini cu Pathian ih puai ni a sivekin kan mai hrang khal ah lungawinak ni nikhat khal a si thu Pope Leo in pehbet in a rak sim. Angelus thlacamnak ah Maria vekin Pathian ih duhnakkha “aw” tin lehrul dingah mitin a rak sawm.
Thumkom Pathian ih duhdawtnak kha kan mah in “Aw’’ ti ih lehrulhnak khal cu a rah suak tampi um hram seh” ti thawn a bangaw tiah a rak sim. Hi mi Vatican thuthang Pope Leo ih Zarhpi ni Pathian thuthangtha sim mi sungin a tawizawngin kan ngan mi asi.
