April 24
Propaganda Fide kaing ih a hmaisabik martyr, Mithianghlim Fidelis cu kum 1578 ah Germany ram, Sigmaringen khuapi ah a rak suak. Freiburg University ih upadi buaih a ngah hnu ah namnehnak pawl pom phah in “Mifarah pawl ih lawyer” ti mi hmin in a pumcawmnak a rak tuah.
Kum 1612 ah Capuchin Sr. tlawng ih lut dingah lawyer a si nak in a rak suak. Cui tlawngah Puithiam cannak a rak ngah. Sualsirnak le thlacamnak thawn a nun a rak khuasak.
A mah cu Pathian thu sim ding le sualthlahnak pawl ngai sak dingah an rak dil. Zaangzelnak in luat dingah tu le tu hi tin a rak ti. “Hling lukhuh a khum tu kan Bawi Jesuh ih a tuah tuan nak ah kan nih tla huam lo tuk ih a tuan mi ralkap pakhat kan si le kan par ah siat cam nak thleng seh,” tiah a rak ti.
Propaganda Fide kaing ih dil nak ruangah Switzerland Grisons ram ih um Bawi Jesuih Thi le Sa a sang duh lo tu ruahnak a nei mi pawl lak ah hna a rak tuan. Pathian hna a tuan lai ah Pathian thu sim hnak in thlacam nak ih hmual a neih sawn kha a thei ruangah a caan tamsawn cu pulpit hmaiah a rak hmang. Protestant tampi pawlpi sungih an luh ruangah a mah a dodal tu pawl in that dingah a thupten thu an rak rel.
Kum 1622 ah Grush khuapi ih Pathian thu a sim laiah a nih in Catholic zumnak cu pumkhat an si ih a hnget khoh zia kha pumkhat a si mi lungpi par ah thuk zetin hram a bun thu lei le van a siatral khal le Catholic zumnak cu ziangtikhmanah a hloh ral lo dingthu a rak sim. Grush khuapi in Seewis khuapi ah a feh ih cu tawk ah Catholic zum nak a dodal tu pawlkom thawn an tong aw ih cu pawl ih thah nak a rak tuar a si. Thah a tuar hlan te ah a mah a that tu pawl hrangah thla a rak cam sak.
Thah a rak tuar tu Bawipa thi le sa a pom thei lo mi pawlkom ih ho tu upa in Catholic zum nak ih a luh nak cu mithianghlim ih Pathian thu ruangah thah a tuarnak ih a hmaisabik a rah asi.
