Pope Leo ih Naples le Pomeii khualtlawnnak ding caanserh suah. (April 24, 2026)
Pope Leo XIV in Pompeii le Naples ih a Tuukhal khualtlawnnak ding caanserh pawl suah a si zo. Hi mi khualtlawnnak cu 2026 May 8 (Tlawngkai ninga) ah a si dingih Pope Leo XIV Pope a cannak kumkhat kim hminsinnak ih tuah mi asi.
Pope Leo XIV ih Pompeii caan hman daan ding pawl zing nazi 8:50 am ah Shrine of the Virgin of the Rosary of Pompeii ah a thleng ding. Cui hmun ah Biaknak lam pawlkom pawl le ram ih thuneitu pawl in hmuahnak caanserh an nei ding asi.
Cuihnu reilo te zing 8:55 am ah Pope Leo XIV in Luisa Trapani Hall ah “Temple of Charity” aiawhtu pawl tonnak a nei ding. Cui tonkhawm awknak ah shrine’s charitable initiatives pawl le cu pawl hnen in bomnak a ngah tu pawl khal tonnak a nei ding.
Zinglam 9:30 am ah Pope cu popemobile motor thawn khuasungah a feh dingih 9:45 ah Piazza Bartolo Lingo ah a thleng ding. Cuihnu ah Biakinn sungah a lut dingih Blessed Sacrament (Bawipa Thi le Sa) hmaiah thlacamnak malte anei ding. Cuitlunah midam lo pawl, kum upa pawl le taksa kim lo pawl khal cibai buknak a nei ding a si.
Zinglam 10:00 am ah Pope Leo cu St. Bartolo Longo kha upat nak pe dingah Shrine umnak ih Biakinn fate khal zohnak a nei ding. Cuihnu ah a zuk hmaiah thlacamnak a nei ding. Cuihnuah caanserh tuah dingih a ra tu Bishop pawl cibai buknak a nei dingih Pompeii Prelature le Shrine ih Puithiam pawl Reconciliation Chapel ah tonnak a nei ding. Zing 10:30 am ah Pope Leo XIV cu Piazza Bartolo Longo ah Missa raithawinak a tuah ding asi.
Zumtu thawng tel pawl cu tualrawn le a kiangkap lamtluan ah an tel ding tiah ruahsan a si ih an mah pawl ih zoh thei le hmu thei dingin TV screen tumpi pawl an bun ding. Sun 12:00 ah Pompeii ih Rosary Siangpahrang Bawinu zuk hmai ah an mai nunphung tuah daan in thlacamnak caanserh a hmang ding asi. Cuihnu ah Pope cu sun rawl ei hnu, sunhnu 3:00ah helicopter in Naples ah a feh ding. Nazi 3:15 ah a thleng ding tiah ruah a si.
Cuihmunah Naples khuapi ih archbishop Domenico Battaglia le khuapi ih thuneitu pawl in hmuahnak caanserh an hmang ding. Naples ah Pope Leo XIV in Archdiocese sungih Puithiam pawl, mah le mah ap aw tupawl kha Cathedral Biakinn pi ah tonnak caanserh a hmang ding. Hi mi caanserhah nauhak pawl in Cathedral Biakinn hmai tualrawn ah khawm aw in hmuahnak caanserh an hmang ding.
Pope cu a sungah a lut hnuah a hmaisabikah Roral Chapel of the Treasury of Saint Januarius (San gennaro) ah a dangten a lut dingih Bawipa thi le sa hmai ah thlacamnak a nei ding. Cuihnuah Pope cu Biakinn laifang lamzin vekin a feh dingih high Altar ah a feh ding. Cuihmun ah St. Januarius ih zuk le a thisen tel mi ampoules ret mi a thianghlim mi thilretnak dipte kha a hmuh ding a si.
Pope Leo XIV cu thlacamnak a neih hnuah thucahnak a nei ding. Cuihnuah Cathedral in a feh dingih Naples ih Piazza del Plebiscito ah a feh ding. Zanlam nazi 5:15 pm ah a thleng ding tiah ruah a si ih zumtu pawl cibai buknak a nei ding asi. 5:20 pm ah Pope Cu San Franceso di Paola Basilica ah a feh ding. Cuihmun ah Minims pawlkom pawl le ram ih thuneitu pawl le biaknak lam thunei tupawl cibai buknak a nei ding.
Cui ni ih netabik caanserh cu zanlam 5:30 pm ah thawh a si ding. Cui caanah Pope Leo XIV in Piazza del Plebiscito ah Naple khua nu, khuapa pawl tonnak a nei dingih thucahnak khal anei ding asi.
Cu mi netabik a netnak ah Immaculate Conception zuk hmai ah tuah a si ding. Cu mi zuk cu Sui Luukhuh an khum ternak kum 200 kim hngilh lonak ah tual rawn ah an keng dingih cui hnuah Pope in Aplstolic Blessing peknak caanserh a hmang ding asi.
Cuihnuah Pope Leo XIV cu Piazza del Plebicito in a feh dingih Rotonda Diaz ah a feh ding. Cuihmunah zanlam 6:45 pm ah helicopter in Vatican ah a kir sal ding asi. Hi mi thuthang cu Vatican thuthangin kan a tawizawngin kan ngan mi a si.
