Sual Sungih Tlaknak Thu
73. Sualnak cu ziang tin kan theithei ding?
Sualnak cu milai thuanthu sungah a kop in a um ringring. Sualnak thu cu Baibal thu thawn, a bik in, Runtu Khrih thu thawn, kan ruah a si le fiangten kan theithei a si. Sualnak a tam a si le Pathian ih zaangfahnak khal a tam sinsin.
74. Vancung mi pawl sual sungah an tla, timi cu ziang ti can a si?
Thianghlim Baibal le Thuanthupi in Setan le khuavang pawl cu vancung mi an si dah tiah in sim. Pathian ih sersiam mi an si ih sual sungih an tlak hlan ah cun a thiangthlim mi vancung mi an si. Asinan, Pathian le Pathian uknakram cu an maih duhhrilnak thawi an el ruangah meikang ram (hell) timi khal a um thok a si. Hi khuavang pawl cu milai hnenah an tlanglengih Pathian an do. Asinan, Pathian in Khrih sungah Setan cu a neh a si.
75. Milai saulnak hmaisabik cu ziang a si?
Khuavang in milai hmaisabik a si mi Adam le Eva sual a sawm tikah Adam le Eva in Pathian thu ngai loin khuavang in thu an ngai sawn a si. Pathian tel lo le Pathian thu ngai loin “Pathian can an duh” (Seemtirnak 3:5) ih Pathian ih thu an el. Curuangah Adam le Eva cu hmakhat tein an maih hrang le an tefasin hrangah thianhlimnak le zawnruah thiamnak ih zaangfahnak laksawng hrampi cu an hlo ter a si.
76. Sual hrampi kan timi cu ziang so a si?
Thianhlimnak le dingfelnak hrampi a um lonak hmun cu sual hrampi a si. Milai cu sualnak hrampi sung ihsin a ra mi a si. Kan maih bulpak sualnak ruangih a cang mi si loin milai kan suahnak ih dinhmun a si. Milai kan semsuahnak hrampi a bangawk ruangah hi sual hrampi cu Adam ih tefasin pawl hnenah a pehzom vivo. Himi pehzom awknak hi mangbangza a siih fiangzet in milai in kan thei thluh thei lo.
77. Sual hrampi ruangah ziang pawl a cang?
Sual hrampi in milai ih thilti theinak le cahnak hrampi cu a tha a nem ter a si. Cun sual hrampi ruangah milai in thu theih thei lonak, harsatnak le thihnak pawl a tongih sual tuahduhnak thinlung a nei ṭheu. Himi sualduhnak lungput cu tisa sualduhnak tiah kan ko.
78. Milai in a veikhatnak sual a tuah hnuah Pathian in ziang a tuah?
A hmaisabik sual tuah hnuah leilungpi cu sual in a khuh ṭheh. Asinan, Pathian in milai cu thihnak ah a tan ta lo. Mangbangza in Pathian in sualnak cu a doneh dingih milai cu sual sung ihsin runsuak a si ding (cf. Seemtirnak 3:15). Hi thu cu Runtupa ih a sim mi thuthangṭha hmasabik a si. Curuangah hi sual sungih tlaknak cu, hmailam ah, lungawinak sualnak (happy fault), tiah kawh a si ding. Ziangruangah tile hi sualnak in Rundamtu in co ter ruangah a si (Liturgy of the Easter Vigil).
