Milai Thu
Catechism of the Catholic Church (no. 66 – 72)
66. Nunau le mipa cu Pathian ih hmuihmel kengin sersiam an si, kan timi cu ziang ti can a si?
Milai cu Pathian ih hmuihmel keng in sersiam a si. Amah Sersiamtu theihtheinak le duhdawtnak cu zalen zet in a nei. Sersiam mi lakah Pathian in milai lawng a ko. A maih Pathian sinak in Pathian in milai cu duhdawtnak le thutheinak thawn ro co ter ve a duh. Milai in Pathian le midang thawn pehzom theinak a nei.
67. Ziangruangah Pathian in nunau le mipa a sersiam?
Pathian in milai hrangah ziangkim a sersiam a si. Asinan, Pathian in nunau le mipa cu amah thei ding, rian ding le duhdawt dingin a sersiam. Cuih hleiah, hi leitlun ih sersiam mi pawl cu Pathian in a maih hnenah milai pawlin pe sal dingin le milai pawl cu vancung ramih hruai dingin a duh. Milai ih thuthuk le mangbangnak cu milai cannak a la tu Ṭongkam ih mangbangza thuthuk sung lawngah kan theithei a si. Pathian ih Fapa cu hmuh thei lo mi Pathian ih hmuihmel famkim a si.
68. Milai miphun in ziangruangah milai pawl cu pumkhat ah a cang ter?
Milai hmuahhmuah cu Pathian hnen ihsin a ra mi an si ruangah Pathian ah pumkhat an si. Pathian in “minung pakhat hnen lawngin leilung miphun hmuahhmuah” (Acts 17:26) a tuah a si. Runtu pakhat lawng an nei ih Pathian ih kumkhua nunnomnak ro co dingin kawh an si.
69. Ziangtin thlarau le ruangpum cu milai ah pumkhat ah an cang thei?
Milai cu thlarau le ruangpum nei mi a si. Milai ah thlarau le ruangpum in sinak pakhat ah an cang ter. Himi pumkhat sinak ruangin milai in Pathian hmuihmel sinak cawisannak a co thei a si.
70. Milai thlarau cu khui tawk in a ra?
Thlarau cu hringtu nu le pa ih hnen ihsin a ra lo. Pathian ih sersiam mi a si ih ziangtik hman ah a thi thei lo. Milai a thih ih milai ruangpi thawn an ṭhen awk tik khal ah thlarau cu a thi lo. Thlarau cu ni netabik thawhsalnak caan ah ruang pumpi thawn an kom aw sal ding a si.
71. Pathian in nunau le mipa lak ah ziang vek pehtlaih awknak a tuah?
Nunau le mipa cu Pathian in milai an sinak ah dinhmun bangaw in a sersiam a si. Pathian in nunau le mipa cu pakhat le pakhat bawmaw dingin a sersiam a si. Kut sihnak sacramentu sannak thawn “pumkhat sinak” (Seemtirnak 2:24) la in fate neih dingin sersiam an si. Leitlun ah hnaṭuan ih leilungpi kilkawi tu dingah Pathian ih a remruah mi an si.
72. Pathian ih rorelnak sungah milai cu ziang vek dinhmun ah a um?
Pathian in milai a sersiam veten a Pathian sinak cu thianhlimnak le zawnruah thiamnak thawn milai a co ter. Pathian ih rorelnak ah milai in harsatnak le thihnak a tong lo ding. Cun, milai sungah siseh, sersiam mi le Sersiamtu lakah siseh, nunau le mipa lakah siseh, nupa hmaisabik (Adam le Eva) le sersiam mi zate lakah siseh, a famkim mi rualremnak le daihnak um dingin Pathian in rorelnak a nei.
