Mithianghlim Vincent Ferrer

April 5

Dominican Siangbawi tlawng ih hminthangbik Pathian thu simtu Mithianghlim Vincent Ferrer cu kum 1350 ah Spain ram, Valencia khuapi ah a rak suak. A nu le pa in MithianghlimVincent hnenah mifarah pawl duhdawt ding, tlawngkai nithum le zarhte ni pawl ah ulh nak tuah ding le, Bawi Jesuh le Bawinu Maria upat nak pawl tuah dingah an rak zirh. Kum 1374 ah Dominican Siangbawi tlawng ih a lut hnu mi lar zet mi Pathian thu sim tu pakhat ah a rak cang. Hmun kip ih a zirh nak pawl cu danglam zetin hlawh tlin nak a rak nngah. A rualpi Siangbawi pawl hnen ah, “Pathian thu nan sim tikah theih awl dingin tahthimnak rawi uh. A ngai tu pakhat ciar in Pathian thu na sim mi thei thiam dingin tuah a tul. A hnok zetih Pathian thu sim mi cu a ngai tu pawl in tha ten an thei thei lo ding,” tiah a rak sim.

Mithianghlim Vincent cu Europe a feh ih sual nak thu, thihnak thu, hellram thu, kumkhua nunnuam nak thu le minung pawl nuam te ten thuthennak niah khual kan tlawn thu pawl a thupi bik in a rak sim. A thu sim a ngai tu tamsawn in an sual an sir ih an sual pawl cu an phuan khop tiang ih Pathian thu sim thiam mithianghlim pakhat a rak si.

A mah thawn khual a tlawng tu Siangbawi tampi pawl in a hnatuan pawl an rak bawm. Mithianghlim Vincent Ferrer in a mah a bawm tu Siangbawi pawl hnen ah, “Sualthlahnak nan pek tikah duhdawtnak kha a thupi bik ah nan ret ringring ding. Aw nem ten tha nan pek tikah siseh, a silole lungruh mi pawl Pathian thu nan zirh ah siseh, a thianghlim mi duhdawtnak thawn nan sim a si ti kha thei fiang dingin nan zirh ding,” tiah a rak forh fial.

Mithanghlim Vincent Ferrer cu kum 1419 ah France ram Vannes khuapi ah a netabik Pathian thu a sim laiah a nunnak a rak cem a si.