RVA Falam Service/ Spemtember 15, 2026
Leitlun pumpi ih um mi Catholic zumtu pawl in October 22 ni ah “Global Rosary for Peace” leitlun remdaihnak hrang Rosary thlacamnak hmunkhat ah tel in thlacam tlang dingah ti a si.
Leitlun pumpuluk Rosary thlacamnak cu America nisuahnak lam tikcu caan (ET) zinglam 10: 00 am ah St. John Paul II ih puai ni ah tuah a si dingih ramtin le nunphung tinkim ih Catholic zumtu pawl cu remdaihnak hrangah hmun khatah thlacam tlang ding a si.
Global Rosary for Peace cu Holy Cross Family Ministries le Congregation of Holy Cross tei in hoha ih tuah mi a si. Hi mi thlacamnak cu innsungsang thlacamnak le Rosary thlacamnak cu kan dunglam kum tampi lai in tha a rak pe tu Holy Cross Puithiam, Fr Venerable Patrick Peyton ih tuahnak cu pehbet in tuah peh mi a si.
Kan dung kum in onlive in lives ih thlah mi thlacamnak ah ram 50 luan, minung 65000 an rak tel thei.
Tui kum ah cun cu mi hnakih tam minung tel dingah timtuah tu pawl in an ruah san.
Cui puai ni thlen hlan ni 63 rei thlacamnak khal tuah a si ih nitin Rosary thlacamnak le innsang thlacamnak a rak khaisang mi pum pe in riantuan tu pawl le a dang zumtu pawl thu, thlarau lam lam hmuhnak ruat phah in an rak sim theu.
Leitlun hmuntin ih ralbuainak pawl, Christian pawl hrem in thahnak pawl le ramkhel lam dinhmun that lonak ruangih minung tampi an tuar peh vivo caan ah timtuah tu pawl in Catholic zumtu pawl in leitlunih zonzaih harsa tuartu pawl le remdaihnak hrang hmun khat ten thlacam dingah an rak sawm.
Hi mi timtuahnak cu Pope Leo XIV khal in remdaihnak hrang Rosary cam dingah Catholic zumtu pawl hnen pehbet in arak forhfial caan thawn a tongaw.
Source- Shalomworldnews
