RVA Falam Service/ September 15, 2025
Asian tluan ih pehthlaiawknak ah tuanvo neitu pawl, thu hla tuah tu pawl le zumnak lam thawn pehpar mi ah online in leitlun a khuh tu pawl 100 luan an tonawknak a hmaisabik Asian Catholic Digital missionaries pawl conference cu Manila khuapi ah tuah a si.
Conference ih tumtah mi cu tuantlangnak kha hngetkhoh ter dingah le Asian tluan ih mission hnatuannak hrangah zate ih hmun khat ih hmuh thiam thei mi hmuhnak tuahsuak thei dingah asi.
Asian ram tluan ih Catholic Digital missionaries pawl, pehtlainak ah tuanvo neitu pawl, online thuhla a tuah tu pawl le zumnak thawn pehpar mi ah online a khuh thei tu pawl 100 luan cu online par an khuh theinak kha a hman mi Christian tettikhan nak ah thleng thei dingah tumtah mi nili rei pumkhawm in tuah mi cu an theh suak thei.
Ahmaisabik Asian Catholic Digital Missionary Assembly cu Philippines ram, Quezon City ih Radio Veritas Asia ih hmunpi ah September 10 in 14 tiang tuah a si.
“Influencers to Witnesses: Synodal Way for Digital Mission in Asia” ti mi thuluu thawn an tuah ih Dungthlun tu pawl ih ” kan mah ih kan hmuh mi kan theih mi pawl kha sim lo in kan um thei lo” (Tirhthlah 4:20) ti mi ttong hrambun in an rak tuah.
Conference ih a teltu pawl hnen online thuhla pawl kha tuah in thlahnak pawl men silo in Christian kiangkap le lungrualnak, zumnak ah Pathian hnatuan duhnak thinlung ah a hramtoh mi tettikhan tu si dingah forhfial a si.
Cuitlunah Asian ram tluan ih missionary hnatuannak hrangah tuah ih fimnak peknak le hmunkhat ih hmuh tlang thiam theinak pakhat tuahsuak ding khal ah tha pek a si.
Hi mi Conference cu Asian Bishop pawl (FABC) ih mipi pehtlaihnak zung (FABC-OSC) le Radio Veritas Asia pawl in Vatican pehtlaihnak (Dicastery for Communication) le Fully Present Network pawlkom in hoha ih tuah mi a si.
Pope Leo XIV in khal ramsungih Cardinal Pietro Parolin ih lethmat tthu cia mi lungkim pinak ca pakhat khal a rak kuat ih hi mi ih atel tu pawl hnen digital thuhla pawl ihsin Khrih ih a hman mi tettikhan tu pawl dinhmun in thanglian dingah a rak forhfial.
Vatican online pehtlaihnak Theological-Pastoral Department ih Director Nataša Govekar khal caanserh ah a rak tel.
Philippines Catholic Bishop pawl Conference ih President a si mi Lipa Diocese Bishop Gilbert Garcera in onnak Missa sumnak ah thusimnak a rak nei.
“Kanmah pawl cu Asia ramah au in Jesuh Khrih kha kan rak ken mi a si lo. Asian thawn naihniam awknak. Asia mipi pawl thu ngainak, mai mipi pawl thawn feh tlangnak, an mah pawl riannak le Jesuh Khrih ih duhdawtnak kha nemten thei in ruat thiam theinak tuahnak in Jesuh Khrih kha kan rak ken mi a si” tiah Bishop Garcera in a rak sim.
Khrih ih ahman mi tettikhannak pawl thupit in FABC pehthlaihnak ih President a si mi Bishop Marcelino Antonio “Junie” Maralit Jr in minung pawl kha digital leitlunah kan um ih san a nei mi thil pawl hawl a si cio vekin pehtlaihnak pawl khal Pawlpi dinhmun in namhnget dingah a tul tiah a rak sim.
“Digital lampi pawl cu ngah a si” tiah a mahin arak sim ih Pawlpi cu Digital san sungah a um ruangah online parah mipi pawl a tontu Pawlpi cu ziangvek Pawlpi a si ding ti mi cu a thupi mi thu simcahnak a si thu a rak sim.
Bishop Maralit in a tul mi thlengawknak panga khal a rak sim. Thuhla ihsin tonawknak ah mipi dinhmun in kiangkap pawlkom ah miduhnak pawl ihsin rinumnakah, zuamawknak ihsin tuah tlangnakah, nehrawknak in tettikhannak ah “Social media cu rawlei duhnak kha a on ter ih Eucharist cu kan thlennak ding tumram a si tiah a rak sum. Online ihsin lilawn pawl din dingah a rak sim.
Hi mi thuthang cu Vatican thuthangin kan ngan mi a si. a
