RVA Falam Service/ September 10, 2026
Myanmar ram ih Cardinal Bo, Maung Bo in Rome khuapi ih tuah mi ramtin conference pakhat ah remdaihnak le Upadi le daan thawn a remcang mi daan thar pakhat a tul thu a rak sim.
Hriamkai lo in minung pawl humhim dingah lole hriam thlahphoihnak tiah ruat lo in dun le daan thawn humhim dingah a tha hnem mi ti daan thar dinhmun in hmu dingah Cardinal Maung Bo in a rak sim.
“Hriam kai lo mi remdaihnak le hriamhrei pawl ret in Pawlpi ih thuthangtha a si mi tuahmawh lo nak thawn pehpar mi ti daan thar”ti mi ramtin thurel tlangnak ah Cardinal Bo in tuahmawh awk lo nak cu tuahmawhnak le ralbuainak pawl a tam vivo mi leilungpi ah lehrulnak pakhat a si thei thu a rak sim.
Pax Christi ih tumtah nak a si mi Catholic Institute for Nonviolence ih hoha ih tuah mi caanserh ah Cardinal Bo ih thusim mi an rak thlah.
Ni hra rei ramtin thurel tlangnak caanserh cu September 11 ni ah St. Francis le St. Clare tei ih thlarau lam ih rohta mi kha cawngin Assisi khawmzawhtu dinhmun an cem ter ding a si.
Cardinal Bo in “Hriamkai lonak ti daan cu humhimnak um lo a si lo. Tamdeuh ih humhimnak ti daan pakhat a si” tiah a rak sim.
Mipi pawl ruat ih humhimnak, hriamhrei tel lo ih mipi kilhimnak le a thangso mi hriamtel lo ih dothlennak kha daan thawn humhim dingah a takin hman theih mi ti daan pawl a si thu khal Cardinal Bo in a rak sim.
Remdaihnak ah hramtoh in sumpai phum dingah Cardinal Bo in ram khat le ram khat palai tuah nak, rualremnak hrangah thudik, remdaihnak hrangih tuah mi pawl social media pawl le buainak pawl kha tamdeuh in hrial in sumpai pawl kha remdaihnakah phum dingah a rak forhfial.
Cu mi ti daan pawl cu dothlennak ih kulh mi tuah nak um lo mi minung sinak kha humhim dingah a pek thei thu a rak sim.
A hman mi humhimnak daan cu a mai daan ah cun hriam kai lo a si.
Cu mi ih a ngah suah ter mi khal cu hriamhrei retnak a can ter” tiah Cardinal in arak sim.
Cuihleiah hriamhrei retnak khal a hril thei mi a pahnihnak kawhnak tin ruat lo in Catholic Pawlpi ih nunram le zirhnak pawl kha a laifannakah ret dingah a tul thu khal a rak sim.
“Remdaihnak cu a si thei mi a si” Kawlram Pawlpi ih hmuhton mi kha hrambun in Cardinal Bo in kum tampi buainak pawl le mai um nak hmun le ram tan in ral kan tlan ko nan kan mah kel kan si. Kawlram mipi pawl”remdaihnak a cang thei.
“Cun remdaihnak cu pakhat lawng a si mi ti daan a si” tiah pehbet in an au thu a rak sim.
Dothlennak tuah lonak cu tihnungza thawn ton caan ah dungsipnak a silole a dik lo mi cohlannak a silo thu khal thupit in a rak sim.
“Kan mai kan hlon duh mi a tha lo mi daan khal kan mah in hmang sal dingah hrialnak a si” tiah a rak sim bet.
Curuangah dothlennak tuah lo in hril dingah ral thatnak a tul thu khal a rak sim.
Cardinal Maung Bo in “Hriamhrei retnak cu mi ral hrut pawl hrangah a si lo” tin khal a rak sim.
Cuihleiah Dothlennak tuah lonak cu Jesuh Khrih ih thuthangtha tetti khan nak le Mahatma Gandhi le Martin Luther King Jr tei pawl ih tanta mi rothil pawl thawn a pehpar thu khal a rak lang ter.
“Nunphung pawlkom ah hriamhrei tel lo mi remdaihnak ngah dingah kan thinlung sungih a um mi hriamhrei pawl khal hrial in hnong thei dingah remdaihnak um lo thei lo in a tul thu” Cardinal Bo in a rak sim.
“Curuangah tihphannak, huatawknak, minung sinak thawn a kalhaw mi pehtlaihnak le thincing ih lehrulh duhnak thinlung pawl kha siatbal dingah a rak forhfial ih hi mi pawl cu buainak, tuahmawhnak a suahter theu mi a si thu ralrinnak a rak pe.
Pope Leo XIV ih thlawsuah pek nak ah Rome khuapi ih conference ih a ra thleng tu pawl cu Pope ih thlawsuah peknak pawl an rak cohlang.
Hi mithuthang cu Vatican thuthangin a tawizawng le a remcang ding zawngin kan ngan mi a si.
