RVA Falam Service/ September 14, 2026
Pope Leo XIV in September 13 Zarhpi ni ah St. Peter tualrawn ih tuah mi Angelus thlacamnakih a simnak ah Khrih in in ngaidam vekin midang pawl khal mi ngaidamnak ih thupit zia kha thupit in a rak sim.
Mi ngaidamnak cu huatnak, thenthek awknak le tuahmawh awknak pawl kha a lan ih remdaihnak thawn duhdawtnak kha a suah ter tiah a rak sim.
“Remdaihnak cu um lo thei lo in a tul. Ngaithiamnak a um lo cun kan mah pawl cu daiten in kan nung thei lo ding.
Tikcu tawkfang a rei cun buainak pawl, mawhthluknak pawl, thinnatnak pawl le lehrulh duhnak thinlung pawl cu kan thinlung sungah le minung khat le khat karlakah a suak theu.
“Cu mi pawl in peh thlaih awknak an siat ter ih innsang pawl a then thek ter ih hleiah ralbuainak khal a can ter” tiah a rak sim.
“Ngaidamnak lawngin kan mah pawl in luat ter ih tleunak khal in pe sal thei.
Minung pawl ih hmuihmel thawn peh par mi le nuncan ziaza thawn pehpar mi farahnak ruangah ruahsannak um lo in hmailam fehnak lamzin a fianglo hmun pawl khal ah tleunak in pe sal thei a si.
Ngaidamnak cu zilthli nem vekin a sah mi khuadur pawl khal a thian fai terih Ni tleu mawi khal a suah ter a si” tiah pehbet in a rak sim.
“Curuangah zangfah lainatnak nei tu Bawinu Maria hnen thlacam tlang uh si.
” Ngaidam dingih harsat caan khal ah a hmaisa bik kekar nakah raltha zetin feh thei dingah in bawm hram seh.
Huatawknak neh in thin natnak pawl a hrial thei mi remdai ten hma a dam sal ter thei mi duhdawtnak ih tleunak kha raltha zet in thehdarh thei dingah in bawm hram seh” tiah Pope in a rak forhfial.
Pope Leo XIV in tui ni ih Gospel thuthangtha a si mi ah Matthew thuthangtha kha hram bun in a rak sim.
Petru in Jesuh hnenah kan par ih mawhnak a nei tu vei ziat tiang kan ngaidam ding tiah a rak sut.
“Veisarih tiang maw” tiah a rak sut.
Jesuh in vei sawmsarih ih vei sarih ” tiah a rak sim.
“Bible cathianghlim ah nambat cu famkimnak kha a aiawh” tiah Pope in arak sim. Curuangah Christian pawl cu laitek um lo in tahnak um lo in ngaidam dingah kawh mi kan si thu a rak sim.
Ngaidamnak cu “Christian nunramih a hramthok hmuhnak pakhat a si ti khal in thupit in arak sim.
Jesuh in a cang thei lo ih a tumzet leiba kha a bawipai hnen ih leiba a nei mi hnenum pakhat thu tahthimnak khal ah a rak sim.
Cui hnenum ih leiba kha a bawipa in zaangfahnak lawngin a rak ngaidam sak nan a mah cu a mah thawn rian a tuan tu pakhat parah cui zaangfahnak a lang ter lo ruangah cawhkuannak a rak tuar. Cuithu in Jesuh cu “peknak le ngaidamnak cu kan mai sinak ih a hrampi a si” tiah ralrinnak a rak pek thu Pope in arak sim.
Ziangah tile “Pathian in zianghmuahhmuah cu a thianghlim mi duhdawtnak thawn kan mah pawl in pe ih cui thatnak kha lehrulnak ah zohman in mah le mah mifamkim ka si tiah an ti aw thei lo ruangah a si.
Curuangah a lak ih pek nak ngaidamnak cu kan nunram ih a hrampi a si lawng silo in minung khat le khat zawnruah aw ten nung dingah a tha bik mi daan khal a si tiah Pope in thu pit in a rak sim.
Peter ih ngaidam nak ih hmuhtonnak.
Pope in Jesuh ih ngaidamnak kha a mah rori ih atep mi Peter ih hmuh tonnak khal tahthimnak ah a rak sim.
Jesuh ih netabik zonzaihharsat caanah Peter nih Jesuh cu ka thei lo tiah veithum a rak el.
“A sinan Jesuh thawhsal hnuah Peter hnen ah a langih Simon in duhdawt maw” “tiah a rak sut ih ka dung i thlun aw ” tiah a rak sawm.
Cui sawm nak cu hmaisabik an tonawk lai ah Jesuh ih sawmnak thawn a bang aw.
“zianghman cang dah lo vekin Peter in Jesuh kha el dah lo vekin a si.
Ngaidam ih thinnatnak hma pawl a dam ter mi cui duhdawtnak cu huham tumtuk a nei ih Dungthluntu pawl lakah a hmaisabik a si mi Peter ih tuanvo kha a rak nemhnget sak” tiah Pope in arak sim.
Hi mi thuthangtha cu Vatican news in Pope Leo XIV ih September 13 ni zarhpi ni ih thuthangtha sim mi kan ngan mi a si. Kan thuthangtha a rak siartu zate parah Pathian thlawsuahnak um hram seh.
13 September 2026
Crd: Vatican News
