RVA Falam Service/ September 10, 2026/
2026 Africa mino puaini (JOAJ) caanserh cu September 7 ah Ghanan ram, Accra khuaah an thok zo a si. A ra lai ding nili sungah Afirca nitlaknak lamih ram 16 in Catholic mino pawl “Nan ralthatnak suah uh – Catholic mino pawl, Africa nitlaknak ih remdaihnak le ruahsannak a lang ter tu le a kaisang tu pawl” ti mi moto thawn an tong khawmaw ding a si.
A nikhatnak ni ah a ra thleng tu aiawhtu pawlkom pawl hmuahnak le Ghana ih nunphung zinzoinak an tuahih, hmuahnak caanserh thawn Bawipai thisa tualrawn ah Rosary thlacamnak thawn nikhat sung caan hmannak an rak cem ter a si.
A nihnih nak (September – 8) ah mino pawl cu “Zumnak ah hrambun in ngamzet ih tetti khannak” timi thuluu thawn zumnak le nunphung thawn pehpar mi thuhla pawl kha an rak rel khawm asi. Missa raithawinak theh ah “Digital fimnak thawn Pathian thusimnak” thurel khawmnak an rak tuah ih zaanlam ah ram tinkim ihsin onmawi, lam pawl le music lam thiamnak pawl hmuhawknak caanserh an rak nei asi.
A nithumnak (September – 9) ah “Pathian thusim dingih thazaang laknak” timi thuluu thawn hotu hnatuan le mihrang thathnemnak hnatuan pawl kha hleice in an rel khawm asi.
Bishop pawl thawn ngennak thurel khawmnak hleiah Africa ram sungih kaihhremnak pawl le harsatnak pawl thiatbangnak, remdaihnak le nikhua thawn pehpar dingfelnak pawl ah mino pawl ih tuan vo an rel khawm ding a si.
A nili nak (September – 10) ah “Zumnak thawn fehtlangnak” timi moto thawn Pathian biaknak le zawnruahnak hminsinnak ni an tuah ding a si. Accraih Biakinn pakhat ah Bawinu Maria cu “Remdaihnak ih Nu” tin an hlan ih sualsirnak le Bawipai thi le sa san nak an tuah ding a si.
A ninga nak (September – 11) ah “Ruahsannak parsuak dingah bawmaw” ti mi thuluu thawn Pathian thusim dingih thlahnak caanserh an tuah ding a si. Ghana ramih pehparmi Pope ih Palai Archbishop Julien Kaboré, (Apostolic Nuncio to Ghana)in a hoha in missa raithawinak an tuah ding a si.
September – 12 zinglamah mino pawl cu remdaihnak, ruahsannak le remawk salnak capi kha mai liang ciarah phurin mai ram cio ah an tlung sal ding a si.
Himi thuthang cu Vatican thuthang ih kan ngah mi a si.
September 7, 2026
Crd: Vatican News & RVA Myanmar Service
