September 8, 2026 RVA Falam Service
Angelus thlacamnak ah Pope Leo XIV in khrihstian pawl dinhmun in khat le khat duhdawt awknak nei dingin Bawipa Jesuh insawm mi tidan(lamzin) pahnih asimi u le nau khat le khat remawk ter theinak le duhdawt awknak kha a rak sim a si.
Vatican thantar ihsin Pope Leo XIV in zarhpi ni angelus thlacam theh ah tuisun thuthangtha sungih kan theih mi “Ruahdaan le tuahnak pawl hrangih tahnak” kha zohin Paul cakuat sungih thukham pahra sung ta “Nangmah le nangmah na duhdawt awk bangin na innhnen khal duhdaw aw” (Rom 13:9) ti mi thukham pakhat sungah komkhawm in a lang ter a si.
Cui thu hngetkhoh ter sin dingah cui catlang ih tlung ah “Nan bakmi cu pakhat le pakhat duhdawt awknak lawng kha si seh” ti mi catlang kha tahthim in leiba pawl cu ngaithiamnak co dingih zaangfah dilnak le ngaithiamnak tuah dingah Bawipa Jesuh in rak zirh dan kha Pope Leo in a rak hmuh a si.
Pope Leo in “Sal ih in cang ter lo dingin, khat le khat parah leiba pakhat kan nei. Cui thil cu khat le khat duhdawt awk nak leiba asi” tin thuk zet in a rak sim. Mi pakhat cio ih kan ngah mi ngaihsaknak, thatnak le ralrinnak pawl cun in zalen ter sinih tuanvo lak thiamnak, tuanvo in nei ter sin a si.
Duhdawtnak lang ter daan phunhnih
Zarhpi ni cathianghlim sungah Bawipa Jesuh in Khrishtian pawl khat le khat duhdawt awknak nei daan phunhnih a rak sim a si.
A pakhat nak ah U le nau khat le khat remthat awknak kha cohlan theinak a si.
Hicu a thianghlim mi fimthiamnak pakhat a si vekin ding felte ih umnak le a dotdot ih tuahdan a tul thu pakhat le pakhat fianhrial tein siseh, cule pawlkom fate khalin siseh, cumi ihsin kiangle kap ah siseh dingfel zetih tong theinak cu nunram ih thangsonak hrangah caan remcang ih thleng thei dingah a tel thu, “Lungkim lo nak le mi that lonak rel cu a ol konan ziang that hnemnak hman a suak lo ih thil umdan tamzet a siatsuah a si” “Cathianghlim in duhdawtnak ihsin kan ngah dingmi zalen nak in zirh a si” tin Pope in a sim.
A pahnihnak cu mitin kha kan u le nau vekih duhdawt dingih sawmnak a si. Hi thil cu harsat caan ah siseh, Pathian hnenih thil pakhat khat kan dil caan ah siseh thlacamnak kha rualremnak pakhat ah in thleng sak.
Tui ni cathianghlim ah Bawipa Jesuh in “Leitlun ah thlacam in nan dil mi thu ah mi pahnih nan lungkim tlang in thla nan cam a si ahcun vancung ih a um mi ka Pa in a lo tuah sak ding” tin ati.
Pope Leo in hi thutiam cu lung thlitum pawl, riahsiatnak le ruahsannak pawl hlawm awk theinak le thlacamnak cu pakhat le pakhat rualrem zetih thangso thei dingah a bawm thei thu a lang zia kha a rak sim a si.
“Zumnak a um lo ahcun mitin cu mipak (mah lawng um) tin ruah a theih ih midang pawl kha mikhual pawl, ral pawl tin rinhelhnak a um thei a si.
Thluasuahnak thawn kan nih cu “Bawipa Pathian ah pakhat le pakhat hmuhawk thiamnak, ngaidamnak le thungainak”pawl ruangah remaw ten a um tlang thei mi u le nau pawl kan si.
Netabikah Pope in kan zaten “U le nau duhdawt awknak lam ih lungawi za leiba” nei thiam dingin in zirh dingah Bawinu Maria hnen thla a cam ih a thusim a cem ter a si.
Hi thuthang cu Vatican thuthang in kan ngah mi a si.
06 September 2026
