Pope Leo cun Canaan nunau nu ih zumnak thu ruat in, Pathian ih zangfahnak in ruahban lo mi tiang in hna a tuan ti kha Kawhhran in theisak ding ah le, milai sinak a siatsuahtu le thleidanawknak pawl khal hlonhlo ding in a ngen.
Pope Leo in Castel Gandolfo ah Sunday Angelus thlacamnak a nei. Cutawk ah Nu Mary vancung ah hruainak puai thu kha vun ruatsal in, Kawhran cun himi puai hi Nu Mary le a Fapa ih pehzomawknak cu thihnak hman ih thenthei lo mi ruangpum le thlarau komkhawm nak a si tin a sim.
Cun, zarhpi ni tinte in , Jesuh dung thlun tu pawl hnen ih a kam mi thu kha a famkim ter a si tin Christian pawl theiternak a nei. Khrih ih thawhsalnak cu “a liamcia mi thilcang a si lo, nunthar nak lam hruai tu sawn a si,” tin Pope Leo in a sim.
A hngetkhoh mi zumnak
Canaan nunau nu cu Jesu ih milai a si lo, ramdang ih um mi a si nan Jesuh biak ding in a zuam ringring. Jesu thawn pehzom aw mi dungthlun tu pawl vek in Jesu dung a thlun tin Pope in a sim. An mah mipum an tong aw dah lo nan, a zumnak cu thupte in a sung ah a rak thum aw zo.
Hi mi Canaan nu cun a maihrang ah zianghman a dil lo, harsat a tong tu a fanu ih damnak ding hrang ah, Jesu cu David ih sungsuak Messiah a si ti zumnak nei in a dil mi a si. A dungthluntu pawl in mi hnaihnok an ti, Jesu a mah rori khal in a thlacam mi kha a hmaisa ah cun an rak sang lo. A sinan thil pakhat a rak thleng. Pope Leo in hitin a sim, Jesu cu a mai hnatuan mi kha thaten a thlun, a mah le mah kha a hmuh mi le a theih mi pawl in a thinlung a ciahneh ter a si. Jesu in hitin a sim: “Nunau nu, na zumnak cu a ropi tuk! na duhnak vek in tuah si ko seh.”
Pathian hnatuannak cu mangbangza
Hi mi Canaan nu le Jesuh tonawknak cun tuisan Khrihfa mi pawl hrang ah a thupi zet mi cawntlak mi thil pakhat in zirh tin Pope Leo in a sim. Kawhhran cun a mah le mah kha Pathian hnatuannak hi ziangtluk mangbang za si ti mi kha thei in Khrih ih daihnak kha karhzai ter ding a si tin a ti.
Zohman in hleifuan an nei lo
Pope Leo cun Christian pawl cu Canaan nunau nu hnen ihsin tangdornak le tumruhnak an zir. A zumnak in “Pathian ih cabuai cu mi hmuahhmuah hrang ah timtuah a si,” ti mi kha a zirh a si. Cule zohman a hleifuan te lawng kha tan ding a si lo, ziangruanah tile mi zovek khal Papathian thawn umnak hmun a um.
Hi zumnak cu tleunak thawn zoh tik ah, Pathian ih fapa le fanu pawl an sinak kha zomtai in thleidang zet le bangawklo zet ih an zoh mi hi tuar thei ci a si lo tin Pope Leo in a sim.
A netabik ah Pope Leo in hitin a mai ruah mi kha a sim, Kawhhran cu “leitlun harnak phunkim lak ah remdaihnak hawl tu” a nung mi Jesuh ih kawhhran a si. Zumtu pawl nan zaten Nu Mary ih thlacamsaknak kha kan dil pei. Nu Mary hla kan ti mi Magnificat hla cu “hla hmuahhmuah lak ah hmual a nei bik mi le tharhlam bik mi hla a si,” tiah a ti. Himi hla cu Pathian mithmu dan vek in mai nunram taktak a hmutu nu ih hla a si ih ziangtik hman ah ruahsannak hlo terlo in duhdawtnak hna tuan theu tu ih hla a si tin a ti.
Hi thuthang cu Vatican thuthang ihsin kan lak mi a si.
