Pope Leo XIV cu Castel Gandolfo ih Apostolic Palace ah zarhthum sung a colh hnu ah Vatican ah a kir sal. A mah cibaiding in lenglam ihsin a hngak tu pawl le nauhak tam pi pawl tla thluahsuah a pek ta.
Pope Leo XIV cu Castel Gandolfo ihsin nazi 8:30 p.m. ah a suak. July ni 5 ihsin colhcan a hman hnu ah July ni 27 zanlam ah Vatican ah a kir sal.
July ni 29 tlawng kai nithum ni ah Castel Gandolfo ah “Canticle of Peace” (remdaihnak hla) timi thlacamnak le u le nau komkhawmnak puai ah tel ding in a ra kir sal ding. Hi mi puai cu Laudato Si’ Center for Higher Education le Andrea Bocelli foundation pahnih pawl kom ih tuah mi a si. Hi puai cu Assisi khuapi ih St. Francis a thihnak kum 800 kimnak hngilh lo nak ih an tuah mi a si. Pontifical Villas ih hmuandum sung ah 7p.m ah an tuah ding.
Pope Leo cu Castel Gandolfo ah ni 23 sung thlacamnak, casiarnak le lehpannak in a caan a hmang. Hitawk ih a um sung ah Zarhpi Ni vei 4 – July 5, 12, 19, 26, sung mipi thawn Angelus thlacamnak a nei ih, a dang a mah bulpak in mipi veihnih tonnak khal a tuah.
July ni 11 ah, Rome Dioceses sung ih um mi rethei harsa pawl mi 200 le nauhak 35 tel in sunrawl an eitlang. Cuihnu zarhkhat rei ah Albano Diocese ih tuah mi Concert ah a tel pi. Cun a leng vei hnih a suak ih hmun thum ah vehvai nak a nei. Cu mi hmun pathum pawl cu:July ni 20 ah Montecassino ih Benedictine abbey, July 22ni ah Vallepietra ih Thumkom Pathian thianghlim biakinn pi ah le Subiaco khuapi ih um St. Benedict ih Monasteries le St. Scholastica umnak pawl an si.
Himi thuthang cu Vatican News in kan don mi a si.
