Bishop Antonio Gómez cun, hi meikang harsatnak a tong tu pawl hrang ah Kawhhran le mipi lam ih bawmnak an pek mi vun ruat in, harsatnak le sunralnak lak ah ruahsannak nei in, Pathian ih sermi hmuahhmuah kilkhawi ding le khawtlang par ah zangfahnak le zumnak thawn a nung tu si ding hi kan tul mi a si tin a sim.
July ni 9 ih meikang tongtu Bedar le Los Gallardo khuapi pawl hrang ah Kawhhran lam in bawmnak an pek. Hi meikang ruangah minung 13 an thi ih 8 in hliamhma an ngah. Andalusia peng ih Los Gallardos ah 6,600 hector tluk tiang in meikang a karhzai ruang ah minung 23 an hlo tin an sim. Innthawng 1500 hrawng cu umnak nei lo in an tlan.
Bishop Antonio Gómez Cantero cun “pehcih lo rori’n thlipi cu meter 100 tluk hla cak zet ih a hran ruangah mitam pi cu an tlan,” tin Vatican thuthang latu hnen ah a sim. Thunei tu pawl cun an kiangkap dinhmun zoh in runsuah theinak lam zin an tuah ih, Kawhhran Parish le Caritas pawl khal cun zamrang zet an runsuak thei a si. Mi tampi cu reilote sung umnak inn ah an um ih, a dang pawl cu bulpak inn ah an um. Bishop cun hi tivek in khat le khat tangkhawm ih bawmawknak an tuah mi hi a tha tuk tin a lawm. Bishop in tualsung Nunau pakhat in mipi pawl tlantul ti ralrinnak pek ding ah biak inn dar a tum mi tla a vunmang suak – hi mi cu poihruak caan ih khawtlang pawl ralrinnak pek duh ih an tuah dan a si.
Bishop Gomes Cantero cun kawhhran lam ihsin bawmnak an pek dan pawl a vun zoh sal ih, siangbawi pawl cu mipi pawl an um pi ih ahleice in kum upa pawl le umnak nei lo innsang pawl hi an kilkhawi tin a sim. Our Lady of Mount Camel puai tuah ding ih a feh nak hmun ah harsat tuartu pawl tla a veh ding a si tin a sim.
Hivek tihnungza a thlen tik ih minung nunak ziangzat kan sung ti thu vun rel in, harnak tuartu runding in tikua sung ih nihnih sung tlatu tlangpar kai pahnih himdam ten an hmu mi kha a vun sim. Hi vek harsatnak lakah Pathian khui ah a um ti an suh tik ah Bishop cun siangbawi pakhat ih tongkam cu a vun mangsal in “Pathian cu na hnen ah aum, thinglamtah par ah nan mah vek in harnak a tuar ve.”
Khristian pawl hi vek harsatnak tuar caan ah khat le khat mawhthluk aw lo ten bawm aw sawn ding in a ngen. “A tu hi mawhthluk awknak caan a si lo, harsat tuart u pawl bawmnak caan hi asi sawn,” tin zumtu pawl” Samaritan Kawhhran” si ding kha a si tin a sawm. Samaritan tha tahthimnak vun cingkeng sal in, Khristian pawl cu “mi zoh tu le hmuak tu, mi damter le kilhim tu si ding ih kawh kan si,”tin Bishop in a ti.
Bishop in venghnen, kawhhran le pumpe hnatuan tu pawl ih tanrualnak cun ruahsannak in pe tin a ti. Khristian pawl cu Pathian zangfahnak ih hmanrua (instrument) si ding ih kawh kan si tin a sim bet: “a cancan ah cun Pathian ih kut le ke, Pathian ih mit, Pathian ih aw le a hna kan si, ziangah ti le Pathian kan zumnak cu midang hrangah ah kan nunnak in hmuh ding,” a si tin a ti.
Netabik ah bishop Gomez Cantero hi mi riahsiatnak cun sersiam mithil hmuahhmuah kilkhawi ding a thupit zia a thar in in hmuh sak a si. Pope Francis ih ‘Laudato Si,’casung ih in zirh mi vun sim sal in “sersiam mi kan ngaihsak a si le sersiam mi in in ngaihsak ve ding,” tin a ti.
Himi thuthang cu Vatican news in kan don mi a si.
