Italian Bishops’ Conference (CEI) ih president Cardinal Matteo Zuppi cu Ukraine ram ah ni 4 sung a khualtlawnnak a thok. Russia ralkap pawl an do lai ih an kaih mi pawl um nak hmun Zakhid -1 center ih um tu pawl hnen ah camkhat te a cawl ih Pope Leo ih thucah mi le laksawng te a ken mi kha a pek ih a sim. Pope in “thla a lo cam sak” a reihlan ah “inn nan tlung thei ding” ti khal ruahsannak kan nei tiah a sim.
Cardinal Matteo Maria Zuppi cun Ukraine ram Lviv peng ih Zakhid -1 thawnginn ih kaih a tuar tu pawl hrang ah laksawng pa thum a keng; 1- keychain(tawhfung), tawhfung ih a duhsan cu “a rei hlan ah na inn tawh cu a parah na ret ding ih na iin hmailam sangkapi na ong ding ih na dudawt mi pawl na pom thei ding” ti mi ruahsan nak ah a si. 2- Salus Populi Romani zuk thianghlim a si. A duhsan cu “Khristian pawl hrang ah kan Nu ih zuk, a sinan mihmuahhmuah hrangah cun ruahsannak zuk,” a si. 3- Pope Leo XIV ih zuk, “nan hnen ah ra ding in I thlah tu Pope in remdaihnak le raldoawknak cem thei ding in thla a lo cam sak” ti mi laksawng ih sullam pawl a sim.
Cutawk ih a khualtlawn nak cu Cardinal Zuppi ih Ukraine ram ralbuainak an ton hnu a veihnih nak hnatuan a thawhnak a si. Hi ti ih milai lainat bawmnak hnatuan cu Kawhhran in ralbuainak ruang ih harsat a tuar tu pawl thawn an naihawk zia le an tuarpi dan hi langternak a si. Ukraine ram ihsin dawi suah mi nauhak pawl kirsal ding, thawngtla thlengawk theinak ding le a thi mi pawl ram sung ah kirter sal ding khal a si.
Kyiv ih an tlawn hlan ah Cardinal Zuppi cu, Apostolic Nuncio, Archbishop Visvaldas le Ukraine Ambassador Yurash pawl thawn thawngtla pawl ih umnak hmun, biakinn te le siizung an va tlawng. Ambassardor Yurash in hi mi hmunpi(thawng inn) cu leitlun huap standard( rikhiah)ih sak mi a si ih an um dan zohfel duh tu pawl hrang ah on a si tin a sim.
Italy ih Avvenire thuthang cun , himi thawng inn sung ih thawng tla tu pawl hi ram 50 lenglo ihsin a ra mi tlawngtla an si. Cardinal Zuppi cun France le Spain tong in an sim mi an thuhla pawl a ngai pawl tha ten a ngai. Ke pakhat hlo tu kum25 thawngtlatu pa hnenah a tuarpi dan le a ruahsannak pawl a lang ter.
Cardinal Zuppi cun ,“kei mah le Nuncio cu nan mah hrang ah ruahsannak pe ding in Pope Leo ih thlah mi kan si, tin thawng tla pawl hnen ah a sim. Hi ralbuainak khal cemlohli ding in le nan mah khal nan inn te cio ah kirsal thei ding in thlaza a lo cam sak” tin a sim. An zate laksawng a zem ih, laksawng ih a sullam a sim.
Netabik ah, Cardinal cun camp sung ih thlacam nak khan te ah thlacam nak a tuah sak ih hi tin a sim: “Na inn tlunnak lam zin na hmuh theinak ding, hi vek harsatnak pawl hmuahhmuah khal um nawn lo ding in le a thar mi nunnak ih na thawh theinak ding hrang ah thlacam uh si.”
Cu le a thinlung tawk phahin hi tin a sim bet, “thiltha lo hmuahhmuah kha kan hlon ding. Pathian cun ruahsannak in pe ring ring. Kan thinlung sung ah thatlonak lut ter hlah uh si, cule Pathian khal cun hi thatlonak neh thei ding in in bawm ding a si.”
Himi thuthang cu Vatican news in kan don mi a si.
