UNICEF ih thuthannak sung ah Afghanistan ram ah kum 5 tang nauhak 3.7 million cu thithakim lo mi an si. Hi tivek in thitha kim lo le in ei harsa ih an um nak hi a rohsinsin ruang ah an nun nak hrang ah tihnung za zet a si tin ralrin nak an pek. Curuang ah Nikhat ni ih, Too Little, Too Late: The Diet Crisis Facing Young Children in Afghanistan, ti mi thuthang ih an than mi sung ah, ram sung ih nauhak pawl ih rawl in-ei a siat dan zia kha a lang ter ih, hi vek cang lo ding in kan kilhim thei nak ding ah a hlankhan te in sumpai hawl nak tuah ding in ralrin nak a pek.
Afghanistan cu, Taliban pawl in thuneihnak an lak ih kum hra lenglo an uk hnu ihsin thok in leitlun ah raldonak, pursum leilawnnak le nikhua tlaksiatnak ruang ah harsatnak a tuartu bik ram pakhat a rak si, tin an sim.
Nauhak thitha kim lo/ in-ei thalo zohhliahnak
UNICEF pawl in Afghanistan ram pumpuluk ah feh in nauhak thitha kim lo zohhliah nak an tuah ih an hmuhsuah mi cu, nauhak pawl cu rawl an ei lo, ei ding zat an ei lo, rilrawng in an um ruang ah an thithakim lo nak hi a si tiah an ti. An sim dan vek a si le, 2025 kum hnak in pengthen 34 sung ih 26 pengthen sung ah hin hi vek thithakim lo ih um nauhak mipum hi an tam sinsin tin an sim.
Afghanistan ih nauhak pawl cu in-ei khop lo nak tikcu caan a thlen hlan ah rilrawng in an um rero zo tiah UNICEF palai tuan tu Dr. Tajudeen Oyewale in a sim.
“Hi an hmuhthar mi cun, nauhak pawl thitha kim lo ih an um hlan ah thaten zoh thei ding ih tuah nak cantha in pe a si. Innsang ihsin thok in rawl ei lo le thitha um mi rawl ei ter lo ih an um a si le hi vek thihta kim lo in an um ding ti mi kha ralrinnak pek nak a si.
Afghanistan ah cun, in-ei khoplonak lawng si lo in ziang tin kim ah baksamnak hlir in an khat.
A rangthei bik ih cangvaihnak nei ding in kawhnak
UNICEF pawl cun, hi vek harsat tuarnak ih sin a rang bik in an luat thei nak ding ah bawmtu ding le tuan pi tu ding pawl an sawm. Agency pawl khal cun, “First Food” ti mi an program ah sumpai phumnak thawn nasa zet ih bawm ding in an ngen. An program sung ah nauhak thla 6 ih sin kum hnih tiang hrang hi a hleice in bawm ding ti hi a si.
Himi thuthang cu Vatican News in kan don mi a si.
