Pope Leo cun thlaici vorhtu pa ih tahthimnak thu ruat in Sunday Angelus thlacamnak hmun Castel Gandolfo ihsin mipi hnen ah thusim nak a nei. Pathian in minung thinlung sung ih a Tongkam thlaici tuh ding ah hin bang ti a nei dah lo. Ziangruangah tile” kan thanau nak hnak in a duhdawtnak huham cu a cak sawn ruang ah a si,” tin a ti.

Hi thuthuk cu a mah Khrih rori hi a si.

“Jesu Khrih a mah rori , minung cannak a lak, a tongkam cu taksa ah a cang ih, kan rundamnak ding hrang ah a nun nak cu a pek ti mi cu, a thihnak ih sin leitlun pumpuluk ah rah tam pi a rah thei ding ah ti ih a Pa ih tuh mi thlaici a si tiah,” a sim fiang.   

Pope Leo cun Pathian tongkam cun thinlung tha lawng lawng hi a hmu thei ringring lo. A cancan ah cun, a hak ih a leet theilo mi lei ram a tong, si lole thinlung hnaihnok tu vek” Lamzin siatsuah mi lungto leiram, asilole hrambur pawl vek an si.” A sinan a cancan ah cun, ziangtinkim thlengter thei tu mangbangza duhdawtnak um nak hmun a si mi “ngaihsak nak le leiramtha,” ah a tla, tin a sim.  

Hiruangah, Pathian in catbang lo in thlaici a tuh nak a si. Ziangruangah tile kan thanaunak hnak in a duhdawtnak a tum sawn ti a theih ruang ah a si.

Pathian cun kan sungih um mi thatnak pawl khal a hmuthluh

St. John Chrysostom ih simmi kha vun ruat in, kan ni minung lam ih hi tawk hmun ah thilcin ding cu a si thei lo ti ih kan ruah mi hman hi Pathian in phundang zet in hna a tuan ih ramtha ah a can ter thei.

Pathian in minung pawl in rinsannak kha minung kan sinak vek ih a theinak ah a thum aw a si. Pathian in kan par ih a tirhsiannak cu a aa ruang ah si lo in, a fim ruang ah a si. A cancan ah cun kan mah rori hman in kan theithiam thei lo mi hi Pathian in kan that nak pawl hmuahhmuah a hmu sawn tin Pope in a sim.

Curuangah, “ Bawipa in kan mah le kan mah  kan theih awk hnak in in thei sawn, nitin kan nunak ah zo ka si ti le ziang ka cang ding ti thei thiam in a mai hnen ah zumnak thawn kan ap awk a si ah cun Pathianin  in rinsannak kha a rehter lo ding.

Pathian ih tongkam cu tangdornak le thinlung thiang te thawn kan san tikah, Thiangthlarau ih rahtha cu a rah a si. Cun St. Paul in Galatian pawl hnenih a cakuat mi sung ta vun ruat in, “cui ratha pawl cu; duhdawtnak, lungawinak, thinsaunak, daihnak, thatnak, rinumnak, zangfahnak, nunnemnak le mah le mah ukawknak ti pawl hi an si,” tiah Pope in a sim. 

“Hi mi thei rahtha pawl cu kan leilung pi in ziang tluk in a tul.

A netabik ah “Thinlung le thlarau a pahnih in timtuah ding le, nitin kan nun ah Pathian ih thuthangtha au pi ding ah siseh,  Pathian ih ram thangso ter ding ah siseh kan tharsuah awk a tul,”   tiah Pope in a sim.

Himi thu cu Vatican thuthang in kan don mi a si.