“2033 kum ah, Jesu Khrih ih in rundamnak kum 2000kim nak puai pi cu lawm ding in kan pan vivo ih, leitlun huap Christian mi pawl zaten kan tuahkhawm pei ih, thosal Jesu Khrih ih tettikhantu si ding ih kawh kan si nak le a thluasuah pawl hawlsal thei dingin kan zuam pei.” Hi mi thu cu St. Peter le St. Paul puai ni ih hmun dangdang ihsin a ra mi Bishop pawl hnen ih a sim mi a si. Hi tivek ih in ratel pi mi hi “u le nau sinak a langter” ih lungawinak tampi ka nei tin Pope Leo XIV in a sim.
Rualremnak lam ah thanso ding ti mi hi zapi duhnak a si
Ecumenical Patriarch le Synod member pawl in hi ti vek in Rome ah aiawh tu pawl nan rak thlah ih nan mai um nak cio ih nan upat, nan rinsan mi mithianghlim pawl puai tla hlanlai ih kan rak tuah theu vek in kan hmang thei ih ka lung awi tuk tiah Pope Leo in a sim. Nikum ah St. Andrew puai tla Phanar khua pi ih St. Geogre biakinn pi ah hlunghlai zet in kan hman lai tla ka vun mang .
Ecumenical Patriarch Bartholomew I, thawn an tonawk lai ah nelawzet in khat le khat an hmuhdan le an ruah dan pawl tam pi an relhaw thei ih “cuihlei ah Christian pawl lak ah remawknak thangso sinsin ding hi zapiduhnak a si” ti thu hla pawl an rel tin Pope in a sim.
Nicaea Council a veikhat an rak tuah mi kum 1700 kim hngilhlonak puai
Pope Leo in himi “Nicaea Council hngilhlonak kan tuah mi cun, Nicene Creed cu leitlun huap Christian pawlpi fehnak ih a hrampi le lamhruai nak a si ding ti a fiang ter a si. Cule a thekaw cia mi sung khal ihsin a hman/dik mi pumkhat si ter thei nak lamhmuh tu khal a si: thumkom Pathian ah pumkhat si nak, pumkhat si nak ah thumkop Pathian” timi hi a langter a si.
Christian pawl cu remdaihnak hmuh tu si ding ah kawh kan si
“Ral, nunphung le zatlang (luhmuhyi) lam ah thenthek aw nak a so sang rero lai fang ah, Christian pawl cu- an mah le mah lak ah an zumnak kha phuang in rualrem ten an um, thinlung tha a nei mi hmuah hmuah hnen ah remdaihnak tuah ding khal an tithei tawk in an zuam”
Kan mah Christian pawl lungrual te in hnatuan khawm thei ding in, a hleice in remdaih nak hrang le, technology lam kha thaten hmangthiam ding in, Pathian ih sersiam mi pawl thaten kilkhawi thei ding in zuam ding kan si tin a sim.
Mipakhat cio ih sinak le nunak humhim ding ah tuanvo kan nei
“A nautabik le a tulsam bik mi pawl ih sin thok in, mi pakhat ih nunnak le sinak humhim ding hi a thupi bik mi kan tuanvo a si. A tu can le hmailam can ah tivek kan si ding tiin simfiang tu a si tin” Pope in a sim.
