125. Jesuh a thih ih a ṭumnak hmun “hellram” cu ziang a si?
Jesuh a thih hnu ih a ṭumnak “hell ram” cu misual pawl hremnak “hellram” kan timi a si lo. Jesuh ih ṭumnak “hellram” kan timi cu Jesuh ih thih hlan ih miding le misual pawl ih thlarau umnak hmun a si. Jesuh ih thlarau cu Pathian a sinak thawn pawlkom in rumdamtu a ngak rero tu miding le miṭha pawl Pathian hnenih an thlen theinak dingah an thlarau pawl hnenah a ṭum a si. “Thihnak parih huham nei tu” (Hebru 2:14), Setan cu Jesuh in a thihnak in a do neh ih Runtupa a hngak tu miding le miṭha pawl cu setan kut sung ihsin a luat ter hai ih vancung sangka a on sak a si.
126. Ziang tluk tiangin Jesuh ih Thawhsalnak in kan zumnak sungah hna a ṭuan?
Jesuh ih thawhsalnak cu Jesuh kan zumnak ih a sangbikmi thudik a si. A maih thinglamtah thawn Pasca thuthuk sungih a thupizet mi khal a si.
127. Jesuh ih thawhsalnak cu ziangmi hminsinnak pawl in an lang ter?
Jesuh cu thihnak ihsin a thosal a si tiah a lawng mi thlankua (empty tomb) le Jesuh a tong hmaisabik tu le a dungthluntu pawl hnenih a phuangtu nunau pawl hnen in kan theithei a si. Cuih hleiah Jesuh cu “Cephas (Piter) le a dungthluntu pawl hnenih a langnak, milai 500 lenglo hnenih a langnak” (1 Korin 15:5-6) le midang hnenih a langnak pawl khal in kan thei a si. Jesuh cu thihnak in a thosal a si tiah dungthluntu pawl in an phuah cawp mi thuanthu men a si hrimhrim lo. Jesuh ih thawhsalnak cu a dungtluntu pawl hrangah zumharsa zet mi a si. Curuangah Jesuh a mah rori in ziangruangah si zumthei loin nan um tiah a dungthlun tu pawl cu a kawk hai a si.
128. Ziangruangah Jesuh ih Thawhsalnak ihsin a sangsawn mi thil a cang?
Jesuh ih Thawhsalnak cu hminsinnak pawl le simfiangnak pawl thawn fiangzetin leitlun ih a cangmi a si tiah kan theithei a si. Asinan cuih Thawhsalnak cu Jesuh in milai a sinak ihsin Pathian ih sunlawinak sungih a luhnak a si ruangah leitlun ih thil cangmi thuanthu men hngak in a sang sawnih mangbangza zumnak khal a si. Curuangah thihnak ihsin a thosal tu Jesuh cun amah le amah leitlun mi hnenah a lang ter aw lo. Dungthluntu pawl hnenah a langih dungthluntu pawl cu mipi hnenih a thawhsalnak thu sim le phuang tu ah a can ter hai.
129. A thosal mi Jesuh ih ruang pumpi cu ziangvek dinhmun ah so a um?
Jesuh ih Thawhsalnak cu hi leitlun nunnak ih kirsal a si lo. A thosal mi Jesuh ih ruang pumpi cu thinglamtah parih thahnak a tuar mi (Jesuh ih) ruang pumpi a si ih a taksa parih hriamhma pawl khal an um lai. Sikhalsehla, a Pathian sinak khal a tel ve ih ruangah a thianghlim le a sunglawi mi ruang pumpi a si. Curuangah thihnak in a thosal mi Jesuh cu a duhnak hmun le caan ah a dungthluntu pawl le mipi hnenah a lang thei a si.
130. Thawhsalnak cu ziangtin Thumkhawm Pathian Pakhat ih hnaṭuan mi a si thei?
Jesuh ih Thawhsalnak cu Pathian in cuangce zet ih hna a ṭuan mi a si. Bawithum pawl cu hmunkhat ten hna an ṭuan tlang: Pa in a cahnak le a thilti theinak a lang ter; Fapa in a pek cia mi nunnak cu “a lak sal” (Johan 10:17) ih a thlarau le a ruangpi cu a kom awk ter sal. Cun Thlarau in nunnak a pek ih a cawisang a si.
131. Jesuh ih Thawhsalnak in ziangvek rundamnak a pek?
Jesuh in minung cannak a laknak ih a sangbik mi cu thawhsalnak a si. Thawhsalnak in Khrih ih Pathian sinak a hngetkhoh ter. Cun Jesuh ih tuah mi le zirh mi pawl khal a hnget khoh ter a si. Milai hnenih Pathian ih thukamnak pawl khal a thling ter. Cuih hleiah thihnak ihsin a thosal mi, thihnak le sualnak neh tu Khrih cu, kan thawhsalnak le kan dingfelnak a si timi khal a langter a si. Ro co tu dinhmun ih kan ngah ding mi zaangfahnak laksawng khal in co ter ih caan a cem tikah kan ruang pumpi pawl cu a tho ter ding a si.
