81. “Jesuh” timi hmin ih ti can cu ziang a si?
Vancung mi in Bawinu Mary hnenih thu a than tikah “Jesuh” timi hmin a pek ih “Jesuh” ticu “Pathian in a run” tinak a si. A hmin in a maih sinak le rundamnak hrangih a hnaṭuan ding a lang ter. Baibal in hitin a sim: “A mi pawl cu an sual sung ihsin a run ding” (Matthai 1:21). Piter in “vanrang hnuai ah milai run theitu hmin dang pek mi a um lo” (Acts 4:12) tiah a ti.
82. Ziangruangah Jesuh cu “Khrih” tiah kan ko?
Greek ṭongin “Khrih”, Hebrew ṭongin “Messiah” timi cu “hriak culh mi” ti can a si. Jesuh cu Khrih a si. Ziangruangah tile Pathian in Jesuh cu a biaknak hrangah a hlan ih Thiang Thlarau in rundamnak hnaṭuan dingin hriak a culh. Jesuh cu Isarael pawlih an hngah mi, Pathian ih leitlun ih a thlah mi Runtupa a si. Jesuh in Runtupa timi thulu a cohlang. Asinan Runtupa timi ih ti can cu hi tin a fiang ter: “vancung in a rungṭum mi” (Johan 3:13), thinglamtah ih an thah mi, thihnak ihsin a thosal mi, zonzai ih hnaṭuan tu hnen um “mi tampi hrangih nunnak a pe tu” (Matthai 20:28) a si. Khrih timi hmin ihsin Khristian hmin a ra.
83. Jesuh cu Pathian ih Fapa neih sun a si, kan timi cu ziang ti can a si?
Jesuh cu hleice zet le famkim zet mi Pathian ih Fapa a si. Tihnimnak a ngah le a hmuihmel a thleng caan ah van in a Pa ih aw in Jeusuh cu hi tin a sim: “ka duh zet mi ka Fapa” (Matthai 3:17). Jesuh in kei cu “Pa thei tu ka si” (Matthai 11:27) a ti. A Pa thawi an pehthlaih awknak a lang ter. Jesuh cu “Pathian ih Fapa neih sun a si” (1 Johan 4:9) ih Bawithumkom sungah a pahnihnak a si. Jesuh cu dungthluntu pawl ih thuthangṭha sim mi bik a si. Dungthluntu pawl in “Pathian ih Fapa neih sun ih hminthannak le sunlawinak” (Johan 1:14) an hmu.
84. “Bawi” timi cu ziang ti can a si?
Baibal Ca Thianghlim sungah “Bawi” timi cu Pathian ih uknak a khihhmuh ṭheu. Jesuh in amaih cahnak le thiltitheinak in, a hleice in, thihnak ihsin a thohsalnak ruangah, leitlun, khuavang (setan), sualnak, thihnak pawl tlun ah “Bawi” a sinak thu a sim. Baibai sungkhal ah hi tin ngan a si. Pathian in “Jeush cu hmin dang hnak ih a sangsawn mi hmin a pek” (Filipi 2:9). Jesuh cu leitlun le milai ih Bawi a si ih a maih hnen lawngah kan ziangkim pek ding a si.
Catechism of the Catholic Church sungta kan hrawm mi a si.
