Sagrada Familia Biakinn pi ah Pope Leo XIV in remdaihnak hrang zuamnak thawn tuah dingah thupit in sim.(June 10, 206)
Pope Leo XIV in cui Biakinn pi kha lungto pawl, a rong pawl le a tleunak pawl a komkhawm mi zumnak ih zirnak pakhat a sithu a langter. Cuitlunah zumtu pawl cu sualnei lo mipi pawl that lo ding, harsat tuart u pawl, a taptu pawl le farah zonzai nak ruangih a tlan rero tu pawl kha hnong lo dingah thupit in arak sim.
Pope Leo XIV in Sagrada Familia Biakinn ih a thlen laiah a thianghlim mi Communion (Bawipa thi le sa) hmaiah thla a rak cam ih hi Biakinn pi kha innsak thiam nak fimnak, a tleunak, a rong pawl hminsinnak ihsin Christian zumnak ih a tum mi langnak pakhat a langsar ter tu Antoni Gaudi ih Thlan khal fehnak a rak nei.
Gaudi a nunnak cemnak kum 100 kim hngilh lonak le Jesuh ih tower (Tower of Jesus Christ) thlawsuah peknak caanserh hrang Missa raithawinak tuah laiah Pope Leo XIV in Gospel thuthangtha ih zumnak kawhnak aw kha mangsal in a rak sim.
Cuihlei ah Christ kha a ngaingai ih zumnak cu tuahmawhnak, ziangsiar lo ih umnak le farah harsatnak a tuartu pawl kha ziangsiar lonak thawn cu a kaih awk lo thu a rak sim.
Catalan ttong le Spainish ttongin a sim mi a thuthangtha ah Pope Leo XIV in Mithianghlim John thuthangtha sungin “ kei cu a mah a si ti nan zum lo a siah cun nanmah pawl cu sualnak sungah nan thi ding” tiah mangsal in arak sim.
Cui ttongkam pawl cu a thuk zet mi ttongkam a si ih ruundamnak sawmnak tongkam khal a sithu a rak sim. Cuihlei ah Jesus kha zum phah in ralbuainak pawl tuah lo ding, Jesuh kha zum phah in sualneilo minung pawl thah a ngah lo thu, Jesuh a zum nan harsatnak a tuartu pawl, a tap tu pawl le farah harsatnak ruangih a tlantu pawl kha hnong a ngah lo thu thupit in a rak sim.
Spain Singpahrang Felipe Vi le a nupi Queen Letizia, Vuancickhuk Pedro sanchez tlun ah ramkhel lam le biaknak lam hotu pawl ih hmuahnak a cohlan hnuah Pope Leo XIV in Sagrada Familia Biakinn pi cu Kutza pahnih a parh mi vekih Sangka pi kha hong in mitin kha hi sumnak ah tel dingah a rak sawm thu a sim.
Cuihmun ah minung pawl cu Pathian ih ttongkam kha ngai thei dingah cui ttongkam in kan mah pawl kha Pathian ih duh zet mi innsang pakhat ah in can ter ih Eucharist (Bawipa thi le sa) thawng in Bawipai umnak kha a langter thupit in a rak sim.
Ramkhel lam le Biaknak lam hruaitu pawl thu a simnak ah Pope Leo XIV in Sagrada Familia Biakin kha Pathian ih tongkam thawn Eucharist (Bawipai thi le sa) kiangkap ah minung pawl a khawm aw ter mi lungrualnak ih hminsinnak ah a rak sim.
Biakinn pi a saktu ih kuthiam kha cawngin Pawlpi cu Lungto tampi thawn sak mi a nung mi innpi pakhat vek a si ih Khrih cu cui innpi ih a hramtoh mi Lungto le tumtahnak hmun a sithu a rak sim.
Cuihlei ah Biakinn pi saknak pehbet in sak a sinak cu Christian nunram kha a aiawh thu, cui nunram cu Pathian in famkim dingah a sak ringring mi hnatuannak pakhat a si ih zumtu pawl kha Pathian ih kuthmang ah tel dingah a rak sawm thu a sim.
Pope in Biakinn pi ih design ah a tel mi thlarau lam thawn pehpar mi a san pawl kha thupit in a rak sim. Pope in Biakinn pi hmailam le thlawsuah a pek mi Jesuh Khrih ih Tower cu ruundamnak, ruahsannak le Pathian ih duhdawtnak kha a langter mi Thinglamtah a kawhhmuh thu a rak sim.
Tower zim ih meisa van mi Thinglamtah cu zumtu pawl ih hmuh thei mi tettikhan nak pakhat a si vekin Khuapi hrangah lamhmuhtu meifar pakhat khal a sithu a rak sim.
Cuihleiah kuthiam cu zumnak kha langternakah a lamdang hleice mi tuahnak pakhat a sithu thupit in a rak sim ih Antoni Gaudi cu Biakinn ih a ra tu pawl kha Khrih thawn a tongaw tertu ding thlarau lam khual tlawnnak pakhat kha a tuahsak ruangah lawm phah in a rak sim.
A thusim a cemnakah Pope Leo XIV in Sagrada Familia Biakinn pi saknak hrang a rak bawmtu pawl hnen a lungawi thu a rak sim.
Cuihlei ah cui Biakinn kha kuthiam ih a lamdang hleice mi kut thiam pakhat a si nak le Gospel thuthangtha simnak ah thazaang a tha mi thil pakhat a si tiah a rak langter.
Zumtu pawl hnen khal ah Khrih hnen lawngah mit kha sangah mengin zoh dingah a silo ih hnon tuar tu pawl, farah harsatnak tuartu pawl, khal khaisang in bawm dingah a rak forhfial. Cuihlei ah Sagrada Familia Biakinn pi ih ruahsahnak le duhdawtnak tongkam in Khristian nunram le tettikhan nak kha lam lo hmuh hram seh tiah thla ka lo camsak tiah a rak sim. Hi mi thuthang cu Vatican thuthang in a remcang ding zawngin kan ngan mi asi.
