Pawlkom ihsin hmun dengkawr tiang- Pope Leo ih Spain ram Tuukhal khual tlawnnak. (June 3, 2026)
Pope ih a ra lai ding mi a Tuukhal khual tlawnnak cu Spain ram ah June 6 in 12 tiang tlawng dingah timtuah a si ih hi khual tlawnnak cu kakip ih zoh tikah a thupi zet mi khual tlawnnak pakhat a si ding.
Cuvekin hi avei 4 nak ramtleng Tuukhal khual tlawnnak parah ruahsannak a neitu khal an tam nasa tiah thei a si. Cui khualtlawnnak sungah Pope Leo XIV cu 2500 klm hlat nak a tlawng dingih, Madrid, Barcelona le Canary Islands ih Gran Canaria le Tenerife pawl ah a cawl ding a si.
Thucahnak, tonawknak tampi, khuapi pawl le stadium pawl ah mitampi hmaiah caanserh ah tel dingah zumtu mipum ting 5 hrawng an tel thei ding tiah ruahsan a si ih thurel tlang ding khal tampi a nei a si. Cui thurel tlangnakah hriamhrei thlah in remdaihnak tuah dingah Pawlpi lam ah Spain le Europe ih ton mi harsatnak pawl tiang nunnak humhimnak le mivai pawl ih thuhla lam tiangin rel dingah a tel ding a si.
Cuihlei ah St. John of the Cross le St. Teresa of Avila vek in “Mithianghlim hmin thang pawl” ih suahnak hmun khal a si. An mai ruahnak le thlarau lam ih an rak zirhnak pawl cu tuisan kan ton mi harsatnak, sawmnak pawl thawn pehpar in Prophet vekin a khawk in a thang lai.
Spain ram ah Pope Leo cu thuanthu ah hminthang mi le nunphung pawl hmuhnak le tonnak a neih ding vekin Pawlpi aiawhtu pawl, mipi thawn pehpar mi pawlkom pawl ih tuanvo neitu pawl, mino thawng tampi, innsang pawl, nunphung le hlasak thiam le zuknung lam ih hminthang pawl khal tonnak a nei ding asi. Cu mi sungah a hrek cu mipi pawl thawn a pehpar mi caanserh pawl khal an tel ding tiah an sim.
Hi a Tuukhal khual tlawnnak cu “an mai zumnak kha nunpi tu miphun phun khat ih zumnak thawn a tongaw ding a si. Hi miphun pawl cu tuini tiang biaknak lam puai ah khuasung vakin velnak a si mi nunphung biaknak lam ti daan kha tui ni tiangih a kilkhawi ih a hmangtu an si.
Pope a mah rori khal June 7 ni Zarhpi ni ih tuah ding mi Corpus Christi ( Bawipai thi le Sa Puai) ni ah khuasung vahnak ah a tel ding. Hi zumnak cu “Pawlpi kiangkap sung lawngah silo in Laitek lo in lamzin pi par ah suak in minung pawl ih nunram ih a feh rero mi zumnak” a si. Hi mi thuthang cu Vatican thuthangin a tawizawngin kan ngan mi asi.
