Tuikum Septembet thla sungah Pope LeoXIV in France (ပြင်သစ်) ram tlawnnak nei ding.(May 16, 2026)
RVAFalam Service, May 16, 2026,
Pope Leo XIV in tui kum September25-28 ni ah France ram ah a Tuukhal khualtlawnnak a nei dingih hi mi cu kan dung kum 18 sungah a hmaisabik official in rampi a tlawnnak ding asi.
Pope Leo XIV in 2026 September 25-28 ni ah France ram ih a Tuukhal khual tlawnnak a nei ding thu Holy See Press Office ih thuthang suahnakih director in a rak than. Hi mi a khualtlawnnak cu Pope in official ih a tlawnnak ding asi.
2008 kumah Pope Benedict XVI in Paris le Lourdes ah a rak tlawn hnu a tui Tuu khal khualtlawnnak France ah a hmaisabik official ih a tlawnnak a si ding.
Thuthang an suahnakah Pope Leo XIV ih a khualtlawnnak ding cu rampi upa dinhmun in ramsungih biaknak lam thuneitu pawl le UNESCO ih director tei ih sawmnak kha cohlangin a tlawnnak a sithu thuthangah an tarlang. Cuihlei ah Apostolic Journey a Tuukhal khualtlawnnak sungah Pope in UNESCO ih zungpi bik khal feh in a vehvai ding asi.
Pope Leo XIV le France President Emmanuel Macron tei khal Pope Leo XIV Pope ih hrilnak a ngah hnuah April 10, 2026 ah a hmaisabik tonawknak an rak nei. Asinan France President ih a hmaisabik Pope tonnak a si lo. Emmanuel Macron cu 2017 ah President ih hrilnak a ngah thokah Pope Francis hnenah Vatican ah veitampi a rak fehtu a si. 2018, 2021, 2022 kum pawl khal ah Pope Francis in cohlang in a rak tong dah a si.
Anmah pahnih cu 2023 September ah Marseille ih tuah mi a dangte ih meeting thurel tlangnak siseh, 2024 June ih tuah mi G7 Summit ah Borgo Egnazia ah siseh, cuihnu 2024 December ah Ajaccio khal ah an rak tongaw dah a si. Kan thuthang nan rak siar ruangah kan lungawi. Hi mi thuthang cu Vatican thuthangin kan ngah mi asi.
