Pope Leo XIV ih Spain ram tlawnnak ding caanserh suah. (May 6, 2026)
Pope Leo XIV ih Spain ram a Tuukhal khual tlawnnak ding thla khat duh ah Vatican thuthang zungin a caanhman daan ding an rak suah. Cu mi caanserh ah Madrid, Barcelona, le Canary Islands tikulh pawl ah a feh dingih Sagrada Failia basilica ih a sangbik mi tower khal thlawhsuah peknak a nei ding asi.
A Tuukhal khual tlawnnak ah thucahnak vei 12 a nei dingih Missa raithawinak vei 4 a tuah dingih ramkhel, biaknak lam le nunphung hotu pawl thawn tonawknak vei 10 a nei ding asi. A hleice ih a Tuukhal khualtlawnnak ih a colh biknak ding hmun thum cu Madrid, Barcelona le Canry Tikulh pawlah a si ding.
Pope Leo XIV cu June 6 ni ah Spain ram ih khuapi Madrid ah a thleng dingih Siangpahrang Felipe VI in cohlang in hmuahnak caanserh a nei ding. Cuihnuah a cozah tuanvo neitu pawl, nunphung pawlkom aiawhtu pawl le ram palai pawl thawn tonnak a nei ding.
A cui ni zanlam ah Madrid khuapi laifang ih Plaza de Lima ah mino pawl thawn thlacamnak an nei dingih a hoha ding. A thaizing Corpus Christi puai pi ah Pope in Madrid ih hmin nei zet mi iconic Plaza de Cibeles tualrawn ah Missa raithawinak a nei ding. Cuihnuah St.Augustine pawlkom pawl thawn a dangten tonnak a nei dingih cuihnu ah cawimawinak lam, nunphung, sumdawnnak le lehpannak lam ih aiawhtu pawl le Madrid ih Movistar Arena khal tonawknak ah a tel ding asi.
June 8 ni Tlawngkai nikhat ni ah Pope Leo in zinglamah Spain Prime Minister Pedro Sanchez thawn tonnak an nei ding. Cuihnuah Hluatdaw a hmat pawl Congress of Deputies ah thucannak a nei ding. Cuihnuah Spain Bishop pawl thawn tonnak a nei dingih zaanlam ah Bernabeu Stadium ah diocesan community thawn tonnak caanserh a hmang ding.
Pope cu June 9 ni ah Barcelona ah a feh dingih a Tuukhal khual tlawnnak ih caanserh hmannak ih a thupi mi Sagrada Familia Basilica ih Jesuh Khrih Tower onnak ah thlawsuah peknak a nei ding asi.
Cui donhleisang Tower sangpi cu Basilica sungih a sangbik mi Tower a si ih kan dung kum 16 lai ih Pope Benedict XVI nak in ap nak a rak neih mi a langsar mi Biakinn tlunah a um. “Lungto par ih sak mi Cathianghlim” ti ih an kawh theu mi Basilica cu hminthang zet mi innsak nak ih design tuah thiam Antoni Gaudi ih a rak suai mi a si ih tui kumah a mai nunnak cemnak kum 100 kim hngilhlonak tla an a rak tuah.
Biaknak lam caanserh pawl le ngamhnget cia mi caanserh pawl tlunah Pope in nunphung kiangkap pawl ih hnon tuartu pawl hnenah a thin phan pinak ah an mah pawl tonnak a nei ding. Madrid ih inn le Lo nei lo tupawl hrangih beunak inn ih sak mi ah a feh dingih cun Barcelona ih Thawnginn ah Thlawng tla pawl hnen ah a feh ding. Cuihnu ah a khual tlawnnak neta lamah mivai pawl ih thu thupit in simnak a nei ding.
June 11 ah Pope in Africa nitlaknak saklam thawn a nai mi volcanic islands ih Canary Islands ah vanzam thawn a feh ding. Cui tikulh pawl cu Europe ah lut dingih a tum tu pawl mivai pawl hrangih a thupi zet mi tidai thawn fehnak pakhat a si. Las Palmas de Gran Canaria le Santa Cruz de Tenerife khuapi pawl ah Pope in Missa raithawinak a tuah dingih mivai pawl le a bawmtu pawl hnen thapeknak a nei ding asi. Pope Leo XIV cu Pope Benedict XVI nak ih Spain rak tlawnnak kum 15 a rei hnuih a tlawnnak a si. Hi mi thuthang cu Vatican thuthangin a tawizawngin kan ngan mi asi.
