Italy Prime Minister a si mi Giorgia Meloni in UNIFL ih Italy ralkap pawl a rak lawm. (April 25, 2026)
Italy Prime Minister a si mi Giorgia Meloni in United Nations Interim Force in Lebanon (UNIFL) pawl kom sungih Italy ralkap pawl a rak lawm. Lebanon thlanglam ih um mi Khritian khua Debel ih siatsuah a si mi Khrih ih Thinglamtah kha a thar pakhat an retsal ruangah asi. Meloni in UNIFIL Commander Diodato Abagnara le Italy ralkap pawl hnen lungawi thu a rak sim ih hi nan tuahnak cu “ruahsannak, thurel tlangnak le remdaihnak” ih hminsinnak pakhat a si tiah a rak sim.
Thinglamtah ret thar mi kha siatsuah tak ih umnak cekci ih ret sal mi hmuh tikah thinlung a na ce tiah a rak sim. Hi thil cang cu kan dungzarh a thok pek lai ih thilcang mi a si. Social Media ih an tar mi video pakhat cu Isreal Defence Forces ralkap pakhat in Jesuh Khrih ih Thinglamtah kha vei tampi a thawi ih a siatsuah mi hmuh si.
Hi Video ruangah Biaknak lam hotu pawl le ramkhel hotu pawl in nasa zet in an rak sawisel ih hi thilcang hi Christian ih hminsinnak pawl le biaknak lam sinak a siatsuah mi tuahsiatnak a si tiah an sawisel cio.
Ralkap sungih an check awk hnuah Isreal ralkap lam in hi ti thil tuahnak cu ralkap ih sinak pawl le cin le daan pawl khal a siatsuah tiah an rak sim. Thinglamtah a siatsuah tu ralkap le video a rak zuktu a dang pakhat kha ralkap lam thurel tu pawl in an hnong ih an mai ralkap Thawnginn ah ni 30 sung ret dingah daan an tat.
Assembly of Catholic Ordinaries of the Holy Land in khal hi thilcang hi nasa tak in a rak sawisel ih Khristian zumnak kha a siatsuah ter mi a thupi mi mawh thluknak pakhat dinhmun ah a rak langter. Cuihlei ah Lebanon thlanglam ah biaknak lam ih hminsinnak pawl siatsuahnak a than rero ruangah a thinphannak khal a rak langter. Hi mi thuthang cu Shalom World News in kan ngan mi asi.
