Ziangruangah Ulh caan a cemnak ah Biakinn sungih zuk pawl khuh asi?(March 31, 2026)

Pawlpi in Passiontide ti kawh mi Jesuh Khrih ih zonzaih tuarnak tik cu caan kan thlen tikah leitlun ih Biakinn pawl sungah a lamdang mi thlengnak tuah a si theu. Lent ulh tikcu caan ih a netabik zarh hnih sung, ulh tik cucaan ih Zarh nganak theh ih zanlam thlacam hnu in Biakinn sungih zuk pawl, Thinglamtah pawl le a dang a thianghlim mi zuk pawl kha a dup zawng puan in khuh an si theu.

Hi mi tuah daan cu Europe hmun hrekkhat ah kumzabi 9 ah a rak um ih zumtu pawl hnen Jesuh Khrih ih zonzaih harsatnak ah thuk zet in hmuthei dingah sawmnak lole thangphawknak a si. Thuanthu ih an simnak ah cu laiah biakinn zaten “Hungertuch” (hunger veil) ti kawh mi puan than tumpi pakhat in an rak khuh ih cu mi cu thlarau thawn hmuhnak phun hnih ah rawl ulhnak ih hminsinnak a si.

Tui tiangah a cui san lai ih an tuah mi kha a theih olnak in tuah vivo a si ih Lent ti mi Ulhcaan zarh 5nak theh in Biakinn sungih zuk pawl cu pakhat hnu pakhat an rak khuh. Hi ti vekin langsar mi pawl khuhnak cu tumtahnak a nei mi tuahnak a si. Cu mi cu Bawipa Jesuh ih zonzaih tuarnak a nai tikah Bawipa a mah rori ih a rak khuh mi thlarau lam thu pawl kha in mang terih Bawipa ih Pathian a sinak cu harsatnak sungah a khuh thu khal a langter asi.

Khuh mi on salnak khal ah san a nei mi hminsinnak a tel. Thinglamtah cu Good Friday ni zanlam ah langter a si ih zuk pawl zate cu Easter Vigil ti kawh mi Zarhte zanlam khawm ah a danglam zet in on sal a si.

Hi tivekin khuhnak le on salnakah a thianghlim mi cangvaihnak sungah zumtu pawl hnen ah Pathian cu ziangti khal ah a hloh lo thu kha in mangter a si. Bawipa a um lo silo in puan thawi khuh ih phennak lawng a si. Cui puan thawi phennak sungin ruahsannak cu daiten in langsal dingah timtuahnak asi. Hi mi thu cu Shalom world news in kan ngan  mi si.