Vancung le Leilung Thu
59. Pathian in ziang a sersiam?
Baibal Ca Thianghlim in hi tin in sim: “A thok ihsin Pathian in lei le van a sersiam” (Seemtirnak 1:1). Cun Pawlpi in a zumnak cu hitin a phuang: Pathian in hmuh thei mi siseh hmuh thei lo mi siseh ziangkim a sersiam a si.
60. Vancung mi pawl cu zo an si?
Vancung mi pawl cu ruangpi nei lo thlarau, hmuh theih lo le thi thei lo an si ih ruahnak le duhnak an nei. Catloin Pathian thu an ruat ih mit hmai ton in Pathian thangṭhat in an um. Pathian an rian. Pathian ih rundamnak hnaṭuan hlawhtling dingin Pathian ih thu than tu palai an si.
61. Pawlpi in Biaknak sungah vancung mi pawl rinsannak a pek maw?
Pawlpi in vancung mi pawl thawn hmunkhat in Pathian a biak. Biaknak sungah Pawlpi in vancung mi pawl hnenah zaangfah bomnak a dil a si. “Zumtu pakhat ciar in nunnak co thei dingin vancung mi in lam a hruai ih a kilkhawi a si” (Saint Basil the Great).
62. Baibal Ca Thianghlim in mit ih hmuh theih mi leithlun sersiam thu ziang tin a zirh?
Ni ruk sung sersiamnak thu ihsin Baibal in sersiam mi leilungpi ih man a neihnak, ziangruangah leilungpi sersiam a si timi, Pathian thangṭhat ding timi le milai rian ding timi thu pawl in zirh a si.
63. Sersiam mi sung lakah milai cu ziangvek dinhmun ah a um?
Milai cu Pathian ih hmuihmel kengih sersiam mi a si ruangah sersiam mi lakah a sangbik le a sunglawibik mi a si.
64. Sersiam mi pawl cu ziangvek in pehthlaih awknak an nei?
Pathian ih duhdan bangin sersiam mi lakah bomawknak le dinhmun niam le sang an um. Sersiamtu Pathian in a sersiam mi pawl a duhdawt ruangah sersiam mi lakah pumkhat sinak le ṭanrualnak a um. Sersiamnak sungih a um mi daan le pakhat le pakhat pehtlaih awknak cu fimthiamnak le ziaza ṭhatnak ih hrampi a si.
65. Sersiamnak le tlennak cu ziangtin an pehtlaih aw?
Sersiamnak hnaṭuan cu tlennak hnaṭuan ah a thupi zek mi a si. Ziangkim famkim dingah sersiamnak thar khal cang dingin a bawm.
