Pope Leo XIV in Sr. Nina Krapic cu Holy See Press Office ah a pahnihnak director dinhmun in tuanvo pe. (February 13, 2026)
Pope Leo XIV in pehtlaihnak (Dicastery for Communication) ah Sr Nina Benedikta Krapic, MVZ kha Holy See thuthang suahnak ah a pahnihnak director dinhmun in tuanvo a rak pe.
Amah cu 2019 kum July thla in cui hnatuan cu a tuanthok ih a tu a pahnihnak director dinhmun in a cawltu Cristiane Murray aiawh in tuanvo ala ding asi.
Pope Leo XIV in Sister Nina Benedikta Krapic MVZ cu Holy See Press Office ih apahnihnak director dinhmun in kan dung Tlawngkai ninga ni ah tuanvo pek a si. Hi mi hnatuan peknak thu cu Holy See Press Office in nitin thuthangah an than mi asi.
Dicastery for Communication ah rian a tuan tu Croation religious sister cu 2026 March thla 1, in a hnatuan dinhmun thar cu a tuan thok ding asi. Sr Krapic cu 1989 kum July 7 ah Rijeka khua ah a rak suak. A mahcu 2015 ah University of Rijeka in upadi (Law) buaih a rak ngah ih 2023 kum ah University of Zagreb ah pehtlaiawk nak lam asi mi Public Relations kha a hleice in a rak zirtu a si.
Amah cu 2023 kum August 13 ni ah Sisters of Charity of St. Vincent de Paul Congregation ah nunsung thukam pathum lak nak a rak nei. A mah cu thuthang media hnatuan nak ah thathang latu dinhmun in a rak tuan ih inn lam ih hmuh suam tuartu nunau pawl le nuntu khuasak nakah mi za a zawn lo tu pawl hrangah daan thu pawl ruahnak rak petu khal a rak tuan. Cuitlun ah a mah cu Caritas of the Archdiocese of Rijeka ah pehtlaihnak ah tuanvo neitu dinhmun in hna a rak tuan tu a si.
2023 kum ah amah cu Dicastery for Communication ah rian a rak tuan thok. A tu ah khal Rome khuapi Pontifical Gregorian University ih Collegium Maximum ah Social Sciences doctorate peh bet in a zingzoi bet rero laitu a si.
Cristiane Murray ih a riantuan nak pawl parah le thiam hleice fimthiamnak thawn a rak tuannak par khal ah kan lungawi tiah Paolo Ruffini – Dicastery for Communication ih upa tuanvo neitu in a rak sim.
Cu mi thinlung nei in Sister Nina Benedikta Krapic hnen khal ah a tha hnem mi hnatuan nak tuan thei hram seh tin thla ka cam sak. A mai hnatuan thawn pehpar in thiamhleice nak pawl parah rinsannak a khat in ka nei tiah pehbet in a rak sim. Hi mi thuthang cu Vatican thuthangin kan ngan mi asi.
