Vatican in Pope ih Ash Wednesday (Vutcaam culh ni) in Thosal puaipi tiang a caan hman ding daan suah. ( February 7, 2026)
Vatican in Pope Leo XIV ih hoha in a tuah ding mi Biaknak lam caanserh hman daan ding khawkhannak an suah ih Ash Wednesday (Vutcaam culh ni) thokin thianghlim zarh sung, Easter Thosal Puai Zarhpi ni tiang suah a si zo.
Biaknak lam caanserh pawl a tawlrel tu Office of Liturgical Celebrations ih suah mi caanserh hman ding daan vekin February 18, 2026 Ash Wednesday ti ih khaw mi Vua luh ni Vutcaam culh ni in Pope Leo XIV cu St. Anselm Church Biakinn pi ah sualsirnak thawn pehpar mi cangvaihnak caanserh a hoha dingih cuihnu ah Rome khuapi ih tlang pasarih sungih pakhat a si mi St. Sabina Basilica ah Missa raithawinak a tuah dingih Vutcaam thlasuah peknak le culhnak caanserh a tuah ding a si.
Cun Pope ih Holy week (Thianghlim zarh) caanserh hman daan ding pawl cu zinglam ah Vatican ih St. Peter tualrawn ah Palm Sunday Paui ni ah Missa raithawinak a tuah ding a si.
April thla 2, ni ih hman ding mi Holy Thursday (Thianghlim thlawgkai nili) ni zinglam 9:30 am ah St. Peter Basilica ah Chrism Mass (Sahriak thlawhsuah) peknak caanserh a hmang ding a si. Cui ni sunhnu lam ah Rome khuapi ih St. John Lateran Basilica Biakinn pi ah Bawipa zaanriah (Mass of the Lord’s Supper) a tuah dingih cu mi cu Pope Francis in Thawnginn pawl le mivai pawl umnak pawl ah Pope Francis ih a rak tuah theu mi mangsal in thuanthu ih tang mi ti daan pakhat khal a si.
Good Friday (Thianghlim Tlawngkai ninga) zanlam nazi 5:00pm ah St.Peter Basilica ah Bawi Jesuh ih harsat tuarnak caanserh a hmang thok dingih cuihnu ah Pope cu Colosseum ah tuah daan theu vekin Thianglamtah lampi thlunnak hmun 14 kha hoha in thlacamnak a nei ding asi.
April 04, 2026 Zarhte ni Thianghlim niruk ni ah Pope in St. Peter Basilica a lenglam ih um mi innkhan ah Easter Vigil ti khawh mi Zarhte ni zanlam khawm caanserh ah Easter meisa (Thosal meisa) Phazawngdine thlawsuah peknak pawl tel mi caanserh hoha in a hmang ding a si.
Pope Leo XIV nakih thianghlim zarh ih caanserh hman ding daan pawl cu April 5 ni Thosal ( Easter Sunday) ni ah St.Peter tualrawn ah a sunglawi mi Missa raithawinak a tuah theh in a caanserh hmannak a cem ding a si. Cuitlun ah Easter thucah le “Urbi et Orbi” Leitlun pi thlawsuah peknak a nei ding asi. Kan thuthang a rak siartu zate parah Pathian in a hleice in thlawsuah lo pe hram seh. Hi thuthang cu shlalom new world thuthang in kan ngan mi asi.
