Pope in Nisuah nak lam Congo ram (DRC) ah thil mankhung hawlnak hmunih lei minnak in minung 200 luan nunnak cemnak ruangah thlacam sak. (February 1, 2026)
Kan dung tlawngkai nithum ni ah DRC ih nisuahnak lam North Kivu ramthenah a thupizet mi coltan leisungsuak thil man khung kua pakhat ah leilung minnak ruangah thilman khung khal tampi a min cih theh tiah thei a si. Cuihmun a kilvengtu M23 hriamkai pawlkom ih ap mi North Kivu ramthen ih simnak ah Rubaya thilmankhung kua ih a cang mi ruangah minung 200 pawl ih nunnak a cem.
Zarhpi ni Angelus thlacamnak ih a simnak ah Pope Leo XIV in cui thilcannak ih siatsuah tuartu pawl le an mai innsang pawl parah nai zetin a um thu thupi in a langter.
Congo ram North Kivu ih um mi thilman khung laihnak kua pakhat minnak ruangah nunnak a cemtu minung tampi pawl hrangah ka thlacamnak thleng hram seh. Cuitlunah harsatnak tampi a tuartu cuihmun ih mipi pawl kha Pathian in bawm hram seh tiah thla a cam sak.
Cuitlun ah Angelus thlacamnak ah Pope Leo in Portugal ram, Italy thlanglam le Mozambique ramah kan dung reilo te ih a cang mi thlisia hrannak ruangah hliam a tuar mi mitam pi pawl hrang khal ah thla a rak cam sak.
Tuizarh sungah Mozambique ram ah a nasa zet mi thlisia hrannak ruangah minung 150an thi ih ruahpi tam tuk surnak ruangih ti liannak ah mipum tan khat hrawngin harsatnak an tuar.
Portugal ram a laifannakah Kristin thlisia ruangah a malbik minung 6 ih nunnak a cem ih nazi pakhat ah kilomiter 202 tiang thli nasa zetin a hrannak ruangah inn siat tampi khal a um tiah a sim. Hi mi cu Vatican thuthangin a tawi zawngin kan ngan mi asi.
