Pope Leo in 2027 kum hrang thlacam tumtah mi suah. (January 30, 2026)
Minung sinak, thil mawi ko tuah thaimnak, nunnak, mivai pawl, kum upa pawl, Thangthar mino pawl le AI ( Artificial intelligent) thu pawl hi hmaikum thlacam tumtah mi hrangah Pope Leo in a suah ih leitlun thawn pehpar mi thlacamtumtah mi hrang Pawlkom hnen a rak ap.
Pope in 2027 kum hrang thlacam dingah tumtah in a rak suah. Tui kum thla tin ah leitlun thawn pehpar mi buaknak pawl le Pawlpi sung ih thuhla pawl hrangah thlacam dingah Kawhhran mipi pawl la rak sawm.
Kum 2027 hrang thlacam tumtah mi cu Pope ih leitlun thawi pehpar mi Worldwide Prayer Network hnen a rak ap. Cu mi pawlkom sungtel pawl thawn Tlawngkai ninga ni zinglam ah tonawknak an rak nei.
Vatican thuthang ih a simnak ah Network pawlkom ih International Director a si mi Fr. Cristobal Fones in “kan umnak Leilung cu amah kelte in a heraw rero” tiah a rak sim. Thlacam dingih tuanvo kan nei mi cu kan zate ih kan tul mi Pathian thawn thukzetih kan pehparawknak , midang pawl thawn kan pehparawknak pawl kha ralrinpeknak a si tiah a sim.
Pope Leo ih 2027 hrang thlacam tumtah mi pawl cu a thuai lam vekin a si.
January
Thlacamnak ah thazaang hmu dingah,
Biakinn sungih a thlengtu tin in thlacamnak kha Bawipa thawn bulpak tonawknak vekin hmu thei dingah le hi mi tonawknak cu kan thinlung le leilungpi kha thlengter thei hram seh tiah thlacam tlang uh si.
February
Midang pawl a finkhawi tu pawl khal kilvennak an ngah theinak ding hrang,
Midang ih nunak, thinlung lam, thlarau lam zaten a kilven saktu pawl cu an tul mi bawmnak an ngah thei in Thinsaunak, fimnak, ralthatnak thazaang pawl thawn sunglam ih hahdamnak le ruahsannak ah lampi on saktu si thei dingah thlacam tlang uh si.
March,
Minung nunnak ih sinak kha upat thei dingah,
Hnatuan theinak, hlawknak lawng thupit in a umtu nunphung karlakah mahlemah khal siseh, midang khal siseh, minung pakhat ciar ih a hleice mi sinak kha hmu in theithiam dingah le man nei ter thei dingah thlacam tlang uh si.
April,
Thil mawiternak ( Art) cu minung ih nunnakah pawlkom cawimawitu si hram seh la hi thil mawi ternak cu minung nunnak kha nunphung a cawimawi ter ih thinlung lam a khaisan ter thei mi Pathian ih tuah mi mawinak kha ruahthiam ter theinnak a hman mi laksawng ah thei thiam dingah tiah thlacam tlang uh si.
May,
Mitin hrangah hnatuan theinak lamzin um dingah,
Technological development thansonak in sinak a nei mi hnatuan thei nak lamzin pawl on hram sehla Thil tuah thiam theinak ( thiamnalnak) kha a tha mi thahnemnak hrangah a hmang thei mi hmailam kha din thei dingah thlacam tlang uh si.
June
Setzuk lam ( alem) (Artificial Intelligence) kha upat tlak sinnak that hnemnak hrang lawngah tuahser in thangso hram seh. Kan mah lam dinhmun in fimkhur zet ih hmang thei ding khal theithiam thei dingah thlacam tlang uh si.
July
Pitar, Putar pawl le kum upa pawl hrang,
Pawlpi sungtel pawl in pilepu, kum upa pawl ih pek mi zumnak le fimnak ih man kha man nei ter in an mai hmuhton mi in zir dingah le duhnak thinlung an neih theinak dingah thlacam tlang uh si.
August,
Thangthar nonawn pawl ih hnatuan le nunram khual tlawnnak hrang.
Mai nunram thawn hnatuan a hawl rero tu thangthar nonawn pawl cu Khrih Jesuh kha an lam tluan kiangkap ih a umtu ti ih an hmuh theinak dingah an thinlung kha ong thei cio dingah tiah thlacam tlang uh si.
September
Nunramah a famkim mi thleng awknak hrang
Kan mah pawl cu tuahsernak le pehtlaihawknak thar pakhat ah um dingah zirthei in thudik thawn humhim tlang uh si. Tuahsernak kha kan ruah tikah tamdeuh in a rual aw ih thlawhsuah thawn a khat mi nunram lamzin kha hmu thei cio dingah thlacam tlang uh si.
October,
Christian pawlkom pawl hrang
Parish tin, pawlkom tin a silole Christian pawlkom tinah Gospel thuthangtha phuannak hrangah hna a tuan thei mi missionary hnatuan kha mai ti thei tawk in tuan in dungthluntu thar (fale thar) pawl kha tuamhlawm thei dingah thlacam tlang uh si.
November
Mivai pawl hrang
Hmunkhuarnak thawn in sunmang nei nawn lo ih a um tu pawl cu a thianghlim mi innsang ih bomnak thawn le thinlung nuamnak thawn sinak, lungrual tlangnak le a hman ih a dik mi komkhawmnak a um mi pawlkom pawl hmu thei hram hai seh tin thla za cam tlang uh si.
December
Christian innsang nunram hrangah
Christian innsang pawl cu nunphung kiangkap ah Bible cathianghlim ih nunnak kha tettikhan tu pawl si thei in zumnak, ruahsannak le duhdawtnak pawl kha kilkhawi in a kilhim thei mi zal (dip) si thei dingah tamdeuh in zir thei dingah thlacam tlang uh si. Hi mi thuthan cu Vatican thuthangin a remcang ding zawngin kan ngan mi a si. Kan thuthang in siarsak tu zate parah Pathian thlawsuahnak um hram seh.
