US in Nigeria ih IS thawn pehpar mi thazaang le nekrawknak tuahtu pawl donak tuah.(December27, 2025)
America ram Unites States in Nigeria saklam tluan ih Islamic State IS thawn pehpar mi tuahsiatnak tuah tu pawl vanzam thawn donak a tuah ih an pawlkom ih sakhan le an hrambunnak hmun hrekkhat pawl donak a rak tuahtiah a sim.
Nigeria ram cu kum 10 luan Jihadist pawlkom pawl thawn an do aw ih a thupi bik in ram ih nisuahnak lam ah a cang tam. Cuihmun ah Boko Haram le Islamic State nitlaknak lam ISWAP pawl in cangvaihnak an rak tuah.
Kan dung rei lo teah cui hmun ih Lakurawa ti kawh mi pawlkom fate pakhat in Nigeria ramri ih Sokoto ramthen sungah um hmunkhuar dingah an rak zuam tiah thei a si. U.S Africa Command in thusuahnak ah vanzam ih donak pawl cu cui pawlkom ih umnak hmun pawl hrekkhat ah a cekci in a rak ngah tiah a sim.
A thoknak lam ih an hmuhnak vek a sile hi donak ah misiatsuahtu pawl tampi an thi thu sim a si nan nunnak cemtu pawl a cekci cun theih a si hrih lo tiah an sim. Nigeria thuneitu pawl in cu donak cu President Bola Tinubu ih lungkimnak thawn tuah a si ih Nigeria ralkap ih telpinak thawn tuah mi a si thu an ngamhnget.
President Donald Thrum in Christmas ni ah Vanzam ih donak pawl cu a ngaingai a si tiah a sim ih ruahnak luar ih misiatsuahtu pawl cu Christian pawl kha an bat ih an hmuhsuam thu ngamhnget in a rak sim. Trump in a simnak ah America cu “IS pawl ih cangvaihnak (Radical Islamic Terrorism) kha thangin kau sinsin dingah a ngai san thei lo thu a rak sim. Jihadist tuahsiatnak ruangah Nigeria Nisuahnak saklam hmun ah kumtampi tuahsiatnak in hliam an tuar ih minung tampi thawngziat hanglo an rak thi tiah thei a si.
Hi thuthang cu Vatican thuthang in kan ngan mi a si.
