Pope in Cameroon le Nigeria ih kaih tuartu pawl thlah dingah dil.(November 23, 2025)
St. Peter tualrawn ih tuah mi Christ the King puaipi thehah Pope in Nigeria le Cameroon ih kan dung naite ih kaih tuartu Thlawngta pawl le Puithiam pawl thlah dingah zaangfah dil nak a rak nei.
Pope Leo XIV in Nigeria le Cameroon ah kan dung naite ih kaih tuartu Puithiam pawl, Tlawngta pawl le Christian pawl ih ton mi parah a riatsiatnak thu tarlang in a sim ih an mah thawn pehpar tu Thuneitu pawl hnen an mah thlahsal dingah, thupi mi tuanvo la dingah zaangfah a rak dil.
Nigeria ram Niger State ih St.Mary phunsang tlawng ah kan dung Tlawngkai ninga ni ah Tlawngta pawl le an zirhtu Saya pawl an zeten 315 kaih an rak tong. Cui zarh thotho ah Cameroon Ndop khuapi ah archdiocese of Bamenda ih Catholic Puithiam 6 kaih an rak tong. Cuihlei ah a kingah ih Bui division thawn naite Jakiri ah Baptist pastor pakhat khal kai a rak tuar.
Zarhpi sun St.Peter tualrawn ih Missa raithawinak theh ih a simnak ah Pope in Nigeria le Cameroon ram ah Puithiam pawl zumtu pawl le Tlawngta nauhak pawl kai an tonnak thu theih tikah a riahsiat tuk thu a tarlang. “Ka riah a sia tuk” tiah Pope in a rak sim. A hleice in kai a tongtu nauhak pawl le an mah thawn pehpar tu an innsang pawl hrangah ka ruah tikah ka riah a sia hlei ce. Kaihnak a tuartu pawl thlah lohli dingah thinlung sungah ka dil ih an mah thlah an si theinak ding hrangah an mah thawn pehpar ih tuanvo neitu pawl in a tul sam mi tikcu khel in tuahsak dingah zaangfah a rak dil.
Netabik ah Pope in Biakinn pawl le cazirnak Tlawng pawl tuahmawhnak le siatsuahnak thawn hla dingah zumtu pawl hnen thlacam dingah a rak sawm. “Kan ulenau pawl hrangah thlacam tlang uh si.” Biakinn le Cazirnak Tlawnginn pawl cu zingtivek caan le khui tawk hmun khal ah himnak le ruahsannak famkim a um mi dinhmun in um thei hram seh tiah a rak sim.
Zarhpi sun Angelus thlacam hlante ah Pope Leo in Missa raithawinak ah tel dingin a ra tu Ukrainian zumtu pawl cibaibuknak a nei ih “Hi Tualrawn ih duhdawtnak le thlacamnak pawl nan inn ah kengin feh uh” tiah thape phah in a rak sim.
Pope in a mai a hmaisabik a Tuukhal khal khualtlawnnak ding a si mi Lebanon le Turkey a khual tlawnnak ding thu khal a rak sim. Cu mi cu Noveber 27, Thlawngkai nili ni ah Turkiye ah a feh dingih olup ti mi tuisan ah cun Iznik ti kawh mi Nicaea kum 1700 kum kim hminsinnak caanserh ah a tel ding thu a rak sim.
Hi mi thawn pehpar in Pope in Christian lungrualnak le Christian pawl ih zumnak hrampi a si mi Nicene Creed AD 325 kha sawhkhi in ngan mi a mai Apostolic Letter biaknak thu “In Unitate Fidei” kha a suah zo thu a rak than.
