“NA INNHNEN CU NANGMAH LE NANGMAH NA DUHDAWTAWK BANG IN NA DUHDAWT PEI”
(4) Na Nu Le Na Pa Na Upat Pei
455. Thukham palinak in ziang a sim?
Thukham palinak in nu le pa le Pathian ih thupek mi pawl upat dingin in sim a si.
456. Pathian ih tumtah cia mi sungah inn sungsang cu ziang vek dinhmun ah a um?
Mipa le nunau cu kutsihnak in inn sungsang ah an fate pawl thawn um tlang dingin remruah mi a si. Pathian in inn sungsang a tuah. Ṭhit umnak le inn sungsang cu:
(1) Nupa ih ṭhatnak hrangah siseh;
(2) Fate neihnak dingah siseh;
(3) Fate pawl ih fimthiamnak hrangah siseh thu pek an si. Innsang sungih um tu zaten pakhat le pakhat pehtlaih awknak an nei ih mah vek ṭuanvo an nei ciar a si. Khrih sungah inn sungsang cu “innsang pawlpi” (domestic church) ah a cang. Ziangah tile innsang cu zumnak, ruahsannak le duhdawtnak ih pawlkom a si.
457. Pawlkom sungah innsang in ziang vek din hmun a nei?
Inn sungsang cu milai pawlkom ih hrampi a si ruangah acozah uktu pawl ih cohlang ding a ṭul a si. Milai pakhat le pakhat peh tlaih awknak ih hrampi cu innsang in man a nei ter. Innsang nun cu pawlkom nun ih thawhnak hrampi a si.
458. Inn sungsang thawn pehpar aw in pawlkom in ziang vek ṭuanvo a nei?
Pawlkom in ṭhitumnak le inn sungsang bom ding le thapek ding ṭuanvo a nei. Tlunlam uktu acozah khal in ṭhitumnak, inn sungsang, ziaza, nu le pa ih thilti theinak, inn sungsang ṭhansonak pawl a upat le thazang a pek a ṭul a si.
459. Fate in nu le pa ih parah ziang vek ṭuanvo an nei?
` Fate pawl in upatnak, lungawinak, nunnemnak le thungainak pawl an nu le pa hnenah an pek a ṭul a si. Nu le pa hnenih upatnak an peknak in siseh, an unau pawl thawn pehtlaih awknak ṭha tei an neihnak in siseh lungrual ten inn sungsangah um thei dingin an bawm a si. Nu le pa an dam lo caan ah siseh, an tar caan ah siseh, umhar le riahsia ih an um caan ah siseh, thin bangih an umcaan ah siseh fate pawl in nu le pa cu thliri le thapekna
k thawn an bom a ṭul a si.
460. Fate parah nu le pa in ziang vek ṭuanvo an nei?
Nu le pa in a hmaisabik ah an fate pawl ih fimthiamnak hrangah ṭuanvo an nei a si. Nu le pa cu fate pawl hnenah zumnak thu a sim hmasabik tu an si. An fate pawl cu milai bangtuk in le Pathian ih fate bangtuk in an duhdawt le an upat a ṭul. Fate ih thlarau le thilri lole ruangpi lam ih an ṭul mi pawl cu nu le pa in tuah sak a ṭul. Fimthiamnak zirnak ah tlawng ṭhaten an hril sak a ṭul. Nunnak hawlnak ah siseh an nundan ah siseh nu le pa in ṭhaten an bom a ṭul hrih fawn. Cun a hleice in Khristian zumnak thu ṭhaten an zirh a ṭul a si.
461. Nu le pa in an fate pawl cu ziang vek in Khristian zumnak an zirh ding?
Nu le pa in an fate pawl cu zohṭhim tlak nunnak, thlacamnak, inn sungsang ih Pathian thu zirhnak le Pawlpi ih hnaṭuannak sungih telnak in Khristian zumnak an zirh a si.
462. Inn sungsang ih pehtlaih awk dan cu ziang vek in a si?
Inn sungsangih pakhat le pakhat pehthlaih awk cu a thupi zet. Asinan, cuih pehtlaih awknak cu thlun tengteng ding timi a um lo. Ziangruangah tile, ṭhimnakah, zumtu Khristian pakhat ih kawhnak hmasabik cu Jesuh thlun ding le duhdawt ding a si.
Jesuh in hitin a sim: “Zokhal sisehla, keimah hnak in a nu le a pa a duh sawn tu cu i thluntu dingah a tlak lo” (Matthai 10:37). Fate pawl ih Jesuh an tlun tikah nu le pa in, ṭhimnak ah, fala thianghlim (sister) ṭuannak in siseh, cun siangbawi ṭuannak in siseh, lungawinak thawn an bom a ṭul a si.
463. Acozah ih thuneihnak cu ziang tin hman ding a si?
Acozah ih thuneihnak cu mi riannak, milai ih thilti theinak upatnak, daan upatnak le thlunnak, dingnak le tawk zawnruah thiamnak pawl hrangah hman ding a si. Thuneihnak a hmang tu pawl in mipi le pawlkom ih ṭhathnemnak hrang an hawl ringring a ṭul. Cun thu an ṭhen tik khal ah Pathian ih duhdan thlun ih thu an ṭhen a ṭul.
464. Mipi in thunei tu pawl hnenah ziang ṭuanvo an nei?
Misenpi in uknak lam ih thunei tu pawl cu Pathian ih palai pawl an si tiah cohlaing thei dingin an zuam a ṭul. Cun thu neitu pawl in mipi hrangih hna an ṭuannak ah mipi pawl in ṭhaten an ṭuanpi a ṭul. Rampi duhdawtnak, hril awknak ih telnak, siah peknak, rampi humhimnak, a ṭha zawngih thu le hla tivek fakselnak pawl thawn mipi in tlunlam ih thunei tu pawl thawn hna an ṭuan thei a si.
465. Ziangvek caan ah mi pakhat cu ramuk tu pawlih thuneihnak thlun lo dingin don a theih?
Mi pakhat in acozah thunei tu pawl ih thupek mi cu a dik lo a si tiah a thinlung sungin a thei fiang a si ah cun cuih a cozah thu pek mi cu thlun lo ih a um a ṭul a si. “Milai thu hnak in Pathian ih thu kan ngai sawn ding” (Acts. 5:29).
