Pope Leo in Holy land, Ukraine le ralbuainak ruangih harsat a tuar mi leitlun hmuntin hrangah remdaihnak hrang dil.
RVAFalamservice, September 8, 2025.
Zarhpi sun St. Peter tualrawn ih tuah mi Pier Giorgio Frassati le Carlo Acutis mithianghlim ih khaisannak puai theh zawngah Pope Leo XIV in “ Pathian in ralbuainak a duh lo, remdaihnak lawng a duh” tiah a sim ih “mithianghlim pawl le Bawinu Maria ih thlacamsak nakin remdaihnak hrang kan thlacamnak kan lo ap a si tiah a sim.
Pope in Holy Land, Ukraine le ral ruangih harsat tuartu pawl hrangah thlacamsak dingah mipi pawl a rak forhfial. Cuitlunah leitlun ram uktu pawl hnen an mai consciences (an thinlung sungih ruahnak ngaingai kha) ngai cio dingah a sawm bet ih “ hriamhrei thawn ngah mi nehnak a si ko nan thihnak le siatsuahnak lawng hi a karhzai ter ruangah nehnak ngaingai si lo in sunnak an si ih remdaihnak le humhimnak kha a tuah suak thei lo tiah tha a rak pek.
Pope Leo in Estonia le Hungary miphung sungin Pawlpi in Mithianghlim thar cannak caanserh a tuah thu khal mangsal in a rak sim.
Estonia ih khuapi Tallinn ah Jesuit Archbishop Eduard Profittlich cu zarhte ni September 6 ni ah mithianghlimah khaisang a si. Cumi cu 1942 lai ih Soviet a cozah in Pawlpi a hrem lai ah thah tuartu a si.
Cunzarhte sun thotho ah Hungary, Veszprem khuapi ah Maria Magdolna Bodi cu mithianghlim ah khaisan a si, amah cu kum note nunau a si ih 1945 ah thah nak a rak tuar ziangah tile ralkap pawl ih nornak do dingah a rak zuam ruangah thah a tuar tu a si. Pope in hi mithianghlim pahnih ih tettikhannak cu Pawlpi in thazaang tampi a ngah tiah a rak sim.
Pope Leo in Zarhpi ni September 7, 2025 ni canonization mithianghlim khaisannak caanserh ah ra in a tel tu minung thawngsawmriat luan tel in bishop pawl, Puithiam pawl, ram ih thu neitu pawl le pawlkom aiawhtu pawl le leitlun hmuntin ih zumtu pawl zaten cibai a buk ih a rak lawm.
Hi mi thuthang cu Vatican thuthangin kan ngan mi a si.
