Pope in Sudan ih Darfur region ah Ti lian nak in minung 1000 nunnak cemnak ruangah a riahsiatnak a langter ih thlacam sak.
September 3, 2025 RVA Falam
Sudan ih Darfur region khua pakhat ah ruahpi tamtuk surnak ruangah August 31 ni ah Tidai lian leiminnak an rak tong.
Sudan Liberation Movement- Army ih simnak ah Marrah Mountains hmun khua ah a malbik minung 1000 an nunnak a cem. Tlawngkai nihnih ni ah Pope in El Obeid Diocese ih Bishop Yunan Tombe Trille Kuku Andali hnen a riahsiatnak thu telegram in a rak kuat.
Cardinal Pietro Parolin ih lehmat thhut hnu ih suah mi thuthangah Pope in an hnenah thlarau lamah nai ten a um thu a sim ih nunnak cemtu pawl ih thlarau le sungkhat hlohnak ruangih riahsia tu pawl le minung tampi hlo ih hawlsuak tu pawl hrangah thla a camsak thu a rak sim.
Pope in nunnak cemtu pawl hrangah Pathian ih zaangfahnak ngah dingin a ap sak ih Sudan ram hrangah hnemnak le thapeknak thawn thlasuah pe in thla a rak cam sak.
Marrah Tlang tluan cu El- Fasher ih saklam 160 kilometers hlatnak ah a um ih ralbuainak hmunram a si ih tlangsannak hmun a si ih hleiah meisa tlangtluan umnak hmun- khal asi.
El- Fasher khuapi in inn le Lo tan tu minung tampi cu a himdeuhnak hmun tlangtluangah an tlan. Sudan ah a cang mi ramsung ralbuainak ruangah minung 40000 luan an nunnak a cem zo ih minung 14 million luan cu an mai inn le Lo tansan in an tlan ter. Ralbuainak ruangih a cang mi Darfur hmunram ah rilrawn laitaam nak le natnak pawl a kaihzai theu a si. Hi thuthang cu Vatican thuthangin a tawi zawngin kan leh mi a si.
