Kawlram ih Biakinn pakhat Vanzam Bom thlaknak ruangah a siat ko nan an zumnak a siat lo tiah sim.
August 27, 2025
Falam khuapi ih Jesuh Siangpahrang Biakinn cu Kawl ralkap pawl in tlunlam ih Bomthlaknak ruangah tui kum, kum thok lam ah siatsuah theh a tong nan Lairam Catholic diocese ih zumnak cu hnget khoh zet in a um thu Bishop Lucius Hre Kung in a sim.
Bishop in Biakinn phar lam tiang an siat suah ko nan kawhhran mipi pawl ih zumnak cu an siatsuah thei lo tiah a sim. Kan zumnak cu a cak, a tunghmun, Falam ih Pathian ih fale pawl a si mi zumtu pawl cu an zumnak le an ruahsannak kha an kilhim ko a si tiah pehbet in a rak sim.
Zumtu pawl in Khrih Siangpahrang Biakinn pi cu kan sak sal dingih mah fek tuanvo la in kan tuan ding tiah Hakha diocese ih Bishop a si mi Lucius Hre Kung hnen tui kum thok lam ih siatsuat a tuartu Chin State, Falam, Christ the King, Parish sung a tlawnnak ih a hmuhton mi sungih a sim mi a si.
Vatican ih Fides News Agency ih an simnak ah ral buainak ruangih harsatnak a tongtu, hi kiangkap ih mai umnak tansan in hmundang ih umtu pawl hrang thlacamsaknak a thupit thu a rak langter.
Harsatnak le hniksaknak karlakah kan mah pawl cu thlacamnak ah fekzet in kan um a tul ih minung pawl ih harsat mangbangnak pawl zate a rak cohlangtu Nu Mary ih Thianghlim thinlung le Khrih thinglung thawn thelh lo in kan pehtlaih a si tiah Diocese hotu in langsar zetin a rak sim.
Christ the King, Catholic Church, Falam ah zumtu minung 1000 hrawng in 2023 November thlaah an sak theh ih Jesuh Siangpahrang hnen an rak ap mi a si. Cui hnu kum rei lote ah CDF le Kawlral kap pawl karlakah doawknak a rak suak. CDF pawl in Khuapi an lak theh hnuah Kawlral kap pawl in vanzam hmang in Bom thlaknak nasa zetih an tuahnak ruangah a thar ih sak sal mi Biakinn cu a siat sal nak a si.
Hi Biakinn pi cu a mawi zet mi Biakinn pi a si ih hi mi sungih zumtu pawl khal in lungtho zet in an rak sak mi asi. Arei hlan ah din sal thei dingah ruahsannak a um. Fr Paulinus G.K.Shing in hi mi biakinnah Ordination ka cohlangnak hmun a si ih zuk pawl ka zoh sal tikah ka thin a nuam lo tiah a rak sim.
Vanzam Bomih siatsuahnak ruangah Mindat khuapi ih Jesuh Thianghlim Biakinn pi khal siatsuah a rak tong. Hi mi Biakinn cu kan dung a reilote ih Diocese din mi a si ih hmailam ah Cathedral ih cang ding mi a si. Mindat Diocese cu January 25, 2025 ih Diocese thar pek mi asi. Hi thuthang cu Vatican thuthangin a tawizawng le rem ding zawngih kan ngan mi a si.
