Mandalay Archdiocese, Pyin Oo Lwin, Inya khuaih a um mi Khristian Pathian thu ruah tlangnak Benedictine Yatih kaing rak din thok tu Mithianghlim Bernard ih puaini missa raithawi nak cu August 19, 2025 (10:30 am) ah Archbishop Marku Tin Win ih kaihhruainak in tuah a si. Hi tlawng cu kawlram ah hmaisabik khristian pawl Pathian thu ruah tlangnak, Pathian riantuan nak Yatih tlawng a si.
Mandalay Archdiocese ih Yatih pawlkom a ra thlen dan thuhla kha Archbishop Tin Win a sim danah “Himi Inya khuaah Yatih puithiam tlawng ziangtin a ra cang suak tile 2013 hrawng ihsin Bishop in khristian Pathian thu ruah tlangnak kha kawhhran pi pawl hnenah tlaici a vorh thok caan a si.
2014 ah Mandalay Myo, Taunggyi Myo, Yangon Myo pawl ih a um mi kawhhranpi pawl Pathian thu ruat tlangnak kha zirh dingin ramdangih Benedictine Yatih kaing puithiam pawl cu kawlram ah an ra thleng lawng ah zirh thok a si.
Cutheh in Fr. Jonah le a tuanpi Yatih pakhat an ra thleng thok ih Yangon ah kawl tong thla sarih hrawng an zir. Cui hnuah Fr. Jonah ih hohanak in Mandalay Diocese ih Bishop le Puithiam pawl ih bawm nak in hmunram pakhat an lei ih inn pakhat sak in an thok a si.
A thok nak lawng a si ruangah harsatnak pawl tampi a um nan tuisun ahcun kan ram mi Yatih pahnih, Yatih Sr pahnih le a zir rero tu pawl, Yatih pawlkom sungih a tel vetu tlawngta pawl khal tampi an um.
Tuini cu Benedictine Yatih pawl, sungtel pawl zate ih puaini a si. Fr. Jonah amah rori in thin tha tho zetin hi Benedictine Yatih kaing hi Asia ram thar pakhat ah hivek pekhlan awknak pawl thawn dinmi a si ruangah lungawinak tampi kan nei. Cu a si ruangah thu a ra ngaitu Puithiam pawl thlacamnak le hnatuan nak pahnih kha hrambun in rian a tuan rero tu Puithiam pawl, Yatih pawl, Sr pawl zatei hrangah thla cam sak uhsi. Kan kawlram Catholic pawlpi ih thuanthu tlaici pakhat cu tuisun kan thok thei zo a si ruangah Pathian hnenah lungawi thu sim phah in pehzulh in kan feh pi hrih pei uh” tiah a sim.
Yatih tlawng dintu Fr. Jonah khal in himi tlawng din nak ih tumtah ih a sim mi cu “Tuisun hi hmuhih a ra thleng tu Archbishop Marku tel in Puithiam pawl, Sr pawl le kawhhran pi pawl zaten hlunghlai zetih a lungawi thu a si. In hmuah nak par ah ka lung a awi.
Ka ruahsan mi, ka hmuitin mi nan mah pawl thawn hlawm tlang ding asile kan Diocese kha kilhim ding, a silole thangso nak hrang um si loin hi ram cu harsat tuartu pawl runnak an ngah theinak dinghrang, an mah pawl thawn nunnak hlan ding man cia ringring mi hmunram pakhat a si.
Minung pawl hrangah minung pawl thawn thi tlang dingin mancia ringring mi kiangkap a si thu, ka tong pawl hi a naa tuk a silole a tawpkawp ka thleng ti nan ruah a si le in ngaithiam uh himi cu ka thinlung ih duhdan menmen a si. Cu le himi hi fiangten ka thei. Hiti ka tong asile ka nau nangmah in tuah thok hmaisa aw tin in ti tla cang thei a dik. Nan tong mi a hman. Curuangah felfai zetin nan thlacam nak kha ka lo dil, hivekin ka nundam theinak dingah keicu fangci cikhat te vekin zalen zetin a tla ih a thi ih a hloh ral nak cu rah tha rah suak thei dingah a si” tin Fr. Jonah in a sim a si.
Himi thuthang cu RVA Myanmar Service ihsin kan don mi asi.
