‘Nuclear ralthuam cu kanmah kilhim ding sinan minung sinak a siat suah le Sersiam mi pawl sinak  siat suah’ tin Pope Leo XIV cun Hiroshima Bishop Alexis Shirama hnenah capi a kuat asi. Cuih capi cu Japan ram Pope ih aiawh Archbishop Francisco Escalante Molina in Hirosima remdaihnak hrang Missa raithawinak ah a siar a si.

A tuih kum cu leitlun ralpi veihnihnak lai ih US rakap pawl in Japan ram, Hiroshima le Nagasaki nuclear bomb an thlaknak kum 80 kimnak a si. Cuih bomb thlaknak ruangah minung 150,000  le 246,000 karlak hrawng an thi a si. Pope cun nulear bomb thlaknak khua pahnih te tuarnak pawl cu hminsin tlakin a tang a si tin a sim.

Cuih thilcang rapthlakzet sungin nungdam in luatnak ngahtu pawl a sunloih thu, an maih tawn mi harsatnak pawl le amah zaten hi leilungpi ziangtin kan kilhim ding, remdaihnak cu zingti vekin thapek in a tu nonawn hrangah hminsin tlak a si ding, Pope Leo XIV cun Pope Francis ih sim mi vekin “ral cu mipi hrangah cem ralnak” lawng asi tin a sim cu sirhsan in caan rei daih ih a dik mi remnak cu “ralthuam rinsan ih buainak a phunphun thuah tu pawl zaten an rinsan mi ralthuam pawl tansan ngam ralthatnak neih a tul thu”a sim a si.

Pope Francis ih sim mi ruat kil sal in a tu leitlun ih cangmi buainak pawl dai ter ding caan a si thu, Hiroshima le Nagasaki cu remnak pek vek ih siatsuahnak a si thu, hminsintlak thu, unau dudawtnak thinlung neinak, zapi thil pawl parih kan tuah tul mi kil himnak pawl kan tuah tul a si tin a sim.

Pope Leo XIV in Hiroshima le Nagasaki bomb thlak kum 80 kimnak ah leitlun pawlkom pawl zaten minung innsang hrang tuan vo lak vekin caan rei daih remdaihnak tuah dingin tuan vo lak ih kan tumtah mi cu ruak kir sal dingin forhfial nak a nei a si. Ralthuam rinsan mi remdaihnak siloin ralthuam tel lo remdaihnak kan tuah a tul a si ti in forhfial nak a nei a si.

Hi thuthang cu vatican thuthang in kan don mi a si.