Leilung pumpi le kiangkap kilhim nak thawn pehpar mi Pope Francis ih suah mi Capi (May 24, 2015)
Ca hmai hruai
No. 1. Ka Bawipa ka Pathian a si mi Pathian hnenah thangthat sunlawi nak um ko seh ti mi a mawi zet mi hla thawn kan zaten bangran ten kan um nak inn a si mi leilung pi cu kan mah pawl thawn kan um nak farnu thawn a bang awk vekin kan mah pawl cu a kut ih in cawi tu duhdawt mi hringtu nu thawn a bang awk thu Asisi khua ih st. Francis in ralrin nak in pe a si.
Kan mah pawl kan nunnak hrangah in bawm in uk ih kan tul mi hanghnah hangrah phunphun, rawng phunkim thawi a mawi zet mi pangpar pawl le si hrangih a tha mi thingkung phunphun kha a kho ter tu farnu le kan nu leilung pi thawng in kan Bawipa a si mi Pa Pathian hnen thangthat nak um ko seh. (St. Francis ih ramsa phunkim sunlawih nak hla)
No. 2. Pathian cu leilung pumpi rem le mawi tei in tuah sak mi mawi nak pawl kha kan tuanvo lak lo nak, a peng zawng ih kan hmang nak pawl ruangih a cang mi harsat nak pawl leilung pi par ih thlen ter nak ruangah hi kan farnu a si mi leilung pi cu kan parah a ttap rero. Kan nih pawl cu a parah duhtawk ih hmun suam theinak duhduh ih siatsuah thei nak a ngah tu Bawi vekin kan mah le kan mah kan ruat aw ih kan cang vai a si.
Sual hrampi ruangih ngah mi hriamhma pawl ruangah minung pawl thinlung ih a cang mi tuahsiat duh nak thinlung cu leiram siat nak, in ding ti, thli le nunnak a nei mi ramsa phunkim ih ton rero mi siat nak pawl ah nat nak hmuihmel in an lang a si.
Curuangah leilung pi cu a phurh thei lo mi thilrit pi pawl a phur ih, siat suah nak pawl a tuar rero ruangah, a nih cu hnon nak a tuar ih hmuhsuan a tuar rero tu mifarah harsa pawl lak ih a thlen thu in sim rero. (Rom 8: 22)
Kan mah khal leidip ih sersiam mi kan si ih (Semtirnak 2:7) kan taksa cu lei par ih chemical thilri pawl thawn tuah a si ih lei par ih thli kha hawp in kan nung ih lei ihsin a suah mi ti ihsin thianhlim nak le thazaang thar kan ngah ti kha kan hngilh theu a si.
