Tikcu thlengawk nak hi, leitlun pumpuluk ih buainak (piahtana) a si ih ruang ah kiangkap thil um dan, nunphung, sumhawl/dawnnak, ramukawknak le leilung sung um thil mankhung pawl hman ding dan lam ah khal a phunphun in sunnak a suah pi thei.

Cu mi cu, tuisan minung pawl ih kan ton mi harsatnak tumbik pakhat a si. Cumi harsatnak ih a zual bik mi cu a thangso rero lai mi ram pawl in tui hnu kum 10 sung ah nasatak in an tuar ding.

A tam sawn mifarah pawl cu nikhua sannak hmun ih um mi an si ih, an nunkhuasak nak cu a siat hrih lo mi serciami (tabawa) leilung sung um thilri le kiangkap ring cop ih thlaici cing, tilvazuat, nga kai/siau le thingkung lam tuan in pumcawm ih um an si. Cu pawl cu a dang sumhawl dan an thiam fawn lo, tikcu thlengawk nak le boruaksia(tabaawa tikcusia) a thlen tik ah a dang hnatuan an thiam lo, khawlcia mi an nei fawn lo, an hrang ah bawmnak mal te  leitek mi lawng a um.

Thuthimnak ah, nikhua a sat tuk tik ah tidai tla a kaang thluh ih ramsa pawl tla  hrampi umnak hmun ah an vak an thawn a tul. Hi vek dinhmun in mifarah pawl ih nunkhuasak dan a har ter a si. Cutin mifarah pawl cu an mai um nak hmun tan in hmundang thar ah umnak hawl in an vai. Kiangkap hmunram(tabaawa)a siatthluh ruangah farah harsatnak dinhmun ihsin luat duh ah hmundangthar ih mivai tu mipum an tam sinsin hi tihnungza a si.

An mah vek pawl hi leitlun huap pawlkom pawl in le miharsa tin an theipi fawn lo. Daan vek ih humhimnakkhal an ngah lo. Cui tlunah, an tan nak hmun ih an hna tuan mi pawl tla an sung theh a si. Thinnat um zia pakhat cu, harsatnak tong tu pawl par ah zawnruahnak an hmuh lo ih, mah thawn ziang hman pehtlaihawknak um lo vek in an theih pi lo mi hi a si. Hi tivek ih zawnruah nak nei lo ih kan um mi hi, ram tinkim ih kan hrambun(foundation)mi  mai milai pi pawl hrang ih tuanvo lakduhnak thinlung ti mi kha a hmuh ngah lo tu kan si ti kha mi hmai ah  a lang.

Laudato Si’ no 25