RVA Falam Service/ November 10, 2026
Pope Leo XIV cu Argentina ramah November 9 ni a tlawnnak ah innsang pawl dinhmun in Khrih ah hngetzet in hram toh in nung dingah minung Pawlkom karlakah zumnak, ruahsannak le duhdawtnak pawl ih tettikhan tu si dingah a rak forhfial.
Pope in Missa raithawinakah innsang pawl hnen mai innsang ciarah Khrih kha hmuakin cohlang dingah, fale pawl kha zumnak thu zirh dingah le Pawlpi ih riantuannak ah thatho zetin tel dingah a rak forhfial.
Innsang tampi ih ton rero mi hnatuan neih lonak, sumpai harsatnak, innsang sungih tuahmawh awknak, innsang thenawknak le mino pawl karlakih rit theih sii hmannak ti mi harsatnak pawl theih thiamsak phah in Pathian cu an mai beunak le thazaang a si thu Pope in zumtu pawl hnen ralrinnak a rak pe.
Cuihleiah Khristian innsang cu san aman lo mi pakhat ah a cng ti khal in ruat lo dingah khal a rak forh fial. Tuisan tikcucaan ah a hlan hnakin tamdeuh in Khrihtian innsang cu kan san ah hin a cekci lole a um lo mi lakah a thupi mi thuam hrampi pakhat in pehbet in um dingah a si tiah a sim.
Pope in nulepa pawl le pi le pu pawl hnen nitin nunram ah a tlaitluang mi tuahnak ihsin zumnak thuhla kha santhar tefa pawl hnen zom in zirh dingah tha a rak pe.
Tahthimnakah innsang hmun khatih thlacamnak, rawl ei hlan ah Pathian thlawhsuah dilnak, khat le khat ngaidamawknak, fale pawl hnen thlacam thiam dingih zirhnak le Zarhpi ni ah Missa raithawinak ah tel dingah tiah a rak sim.
Pope Francis ih Amoris Laetitia ti mi duhdawtnak ih lungawinak ih forhfialnak ca ah a langter mi zirhnak sirhsan in innsang sungah hmun khat ten thlacamnak le Missa sumnak ah telnak in mai inn ah Thiangthlarau umnak hmun pakhat ah cangter dingah a thupit thu thupit in a rak sim.
Agentina ramih Pawlpi in nan mah a lo tul a si tiah Pope Leo XIV in a rak sim ih innsungsang pawl in Pawlpi ih Gospel thuthangtha darh dingih riantuannak ah telin bawm dingah a rak forh fial.
Netabikah innsang zaten Lujan khuapi ih Bawinu Maria le St. Joseph ih thlacamsaknak hnuaiah a rak ap ih innsang tinah Khrih cennak Biakinn pi pakhat si dingah thla a rak cam sak.
Himi cu Vatican News in kan ngan mi a si.
Crd/ Vatican News
November 9, 2026
