RVA Falam Service/ October 16, 2026
St. Peter Biakinnpi rak apnak kum 400 kim hngilhlonak ah “Pétros ení – Discovering the Origins” hmin nei mi hngilh lonak zuknung thar kha zuk a si. American ram mi lemcang thiam Chris Pratt a tel ih Pope Leo XIV nak khal a hleice in atel mi hi zuknung cu Dungthluntu pawl lakah a hmaisabik a si mi St.Peter ih thlan kha hawl nak khualtlawnnak pakhat dinhmun in mipi pawl a hruai ding a si.
Spain zuknung director Paula Ortiz in Director dinhmun in a zukih vatican thuthang editor kaikhawmtu Andrea Tornielli in thuanthu ngan mi a si.
Cu mi zuknung cu 2026 October 16 niah Rome Zuknung puaipi ah a hleice in pholang a si ding.
St.Peter ih thlan hawlnak.
“Pétros ení: Discovering the Origins” cu 2026 November 18 ni ah St.Peter Biakinn pi ong ih an rak apnak kum 400 kim hngilh lonak ih tuah mi hngilh lonak zungnung thar a si.
Hi mi zuknung cu Frank Ariza le (Manu Vega tei rak din mi AF Films in a rak suah. Vatican media le St.Peter biakinn pi kha kilhimtu pawlkom Fabric of St. Peter pawl tla kom in an rak tel a si.
Spain direcror Paula Ortiz in a rak zuk ih Vatican media ih Editor Andrea Tornielli in a rak ngan mia si.
Cuihleiah hlan hlanlai thlan hmun Vatican Necropolis thawn pehpar mi thawn thiamsang le hlanlai thuzingzoi thiam Pietro Zander ih ruahnak paek mi pawl khal lak a si.
October 16, 2026 Europre a laifannak tik cu caan zinglam 11 le khuai ah Rome khuapi zuknung puai ah a hleice ih langter ding mi vatican hnuai ig Thlan hmun ih a um mi St.Peter ih thlan khal hmuh a theih dinga si.
A cui thlan cu mi ih hmuh thei lo nak hmunah a um ih a lenglam cu a menmen a si ko nan thuanthu le zumnak ah a thupi zet mi hmun a si.
American zuknungah lem cang thiam Chris Pratt cu zumnak, thuanthu le hlan thuanthu zohfelnak kom khawm in paih um zet mi khualtlawnnak pakhat ah mipi pawl kha lam a hmuh ding a si.
Cui khualtlawnnak cu a tum ih a sunglawi mi St Peter Biakinn pi ih a thuk zet le mi hmuh thei lo mi hmun tiangin feh a si dung.
Hi mi zuknung ah Pope Leo XIV khal thupi zetin a tel ih neta lam ah St.Peter ih thuanthu le Biakinn pi hnuai ih a thlan umnak ih a thupit nak khal a rak sim fiang.
Innsak thiam Bernin in design a rak suai mi Biakinn pi ih thuam le a tlang pawl cu Christian khuavel a rak khuh thei ti ih ruah a si. Innsak thiam Chris Pratt in hi tumtahnak ah Pope Leo le Vatican thawn komkhawm in tuahnak cu zumban lo tiang in ka lungawi a si. St.Peter ih thuanthu cu Christian zumnak ih a hrampi a si ih a mai rothil kha zuknung ihsin langter dingah zumaw zet in tel theinak can tha in pek ruangah ka lungawi hleice tiah a rak sim.
St. Peter Biakinn ih thuanthu cu Galilee ram ih Nga kaitu pakhat a si mi St.Peter ih nunram thawn a pehpar aw. Jesuh Khrih ih hram thok in a rak din mi Pawlpi hoha dingah a mai hnenah tuanvo a rak pe. Nero san Christian pawl hnen hremnak pawl a rak can laiah St. Peter cu Rome khuapi ih Vatican tlang parah nunnak pek in tetti a rak khan tu a si.
Christian biaknak a rakthok lai ih kumzabi pawl lai in a mai Thlan umnak hmun cu zumnak le biaknak ih a thupi mi a laifannak pakhat ah a cang. Curuangah Christian biaknak ah a thawn mi an tam zet ih St.Peter ih Thlan kingah phum dingah duhnak an rak nei cio.
Hi mi hngihlonak zuknung cu hlanlai thuanthu kha a sangsang in zohsal mi khualtlawnnak ihsin a hlanih rak zuk dah lo mi sidaan kha an rak hmang ih St.Peter ih Thlan kha hawl in an rak zingzoi. Christian zumnak ah a thawn dah mi a hmaisabik Rome Siangpahrang Constantine cu St.Peter ih Thlan kha kilhim dingah a rak zuam tu a si. A hmaisabik mi Biakinn pi kha dindingah Vatican tlangmual kha rawn ter dingah a rak rem ter ih Thlan umnak hmun khal Biakinn pi sungah telh in a rak sak.
Pope Pius XII cu 1950 kum ah cui Thlan cu a rak hmu thu a rak than. Cu mi hlan kum 10 hrawng ah ralbuainak sung khal ah hlanthil kilhim tu pawl ih hnatuantu pawl thok thei dingah a mah in a rak forhfial. Netaah pehbet in an rak tuah mi Tuktitanah pawl ih simnak ah Pope Paul XI Jesuh dung a rak thluntu Galilee mi Ngakaitu ih a ruhreu pawl khal a rak hmuh thu 1968 kum ah leitlun thei dingah a rak than.
Pope Paul XI in culai ah a tanglam vekin a rak sim. “St.Peter ih rothil pawl kha kan zum ban lo ding mi ti daan in a rak langter a si. Curuangah dungthluntu pawl ih hoha tu a si mi St. Peter ih ruh cu malte lawng arak tang nan a man khung tuk mi a ruhreu pawl kha hawl in kan hmu a si tiah zum dingah thu a rak um a si.
Hi thu cu Vatican thuthangin a remcang ding zawngin kan ngan mi a si.
