RVAFalamService/ October 7, 2026
Gaza ah nunnak cemtu pawl hrangah ah Pope Leo in thla a rak camsak. Isreal ih vanzam thawn donak ruangah minung 5 an thi hnuah Pope Leo XIV in Gaza khuapi ih Holy Family Catholic biakinn pi ih tuanvo neitu Puithiam hnen a riahsiat thu ca in a rak kuat. Nunnak cemtu pawl lakah Christian nunau pahnih khal an tel. Pope in Gaza ih Christian pawl hrangah a riahsiatnak a langter ih thla a cam sak thu a rak sim.
Cui donak cu October 3 zarhte ni zinglamah Gaza khuapi ih nitlaknak lam Rimal vengih minung umnak inn pakhat a ngah ih minung tampi khal hliam an tuar. Nunnak cemtu pawl lakah Maysa Khader Ibrahim Abu Daoud le a fanu Mary Hafez Michel Najjar tei an tel. Greek Orthodox Christian nunau pahnih an si. Pope Leo in nunnak cemtu pawl hrang ah thla a rak cam ih Puithiam ih riantuannak hrang khal a lungawi thu a rak sim.
“Maysa le Mary tei nunnak cemnak khal ah riahsiatnak thuthang theih a si thokin an mai hrang le an innsang pawl le Gaza ram pumpi hrang Pathian hnenah thla a cam sak. Aw Bawipa ziangtik tiang kan rei lai ding?” tiah Pope in a rak ngan.
Remdaih ten um duhtu pawl tampi le Biakinn kiangkap kha pehbet in a langter nak ruang khal ah ka lungawi. Pathian thlawsuahnak pawl thawn duhdawt lainatnak thawn cibai ka lo buk” tiah Pope in a rak ngan.
Cuihleiah Jerusalem Latin biaknak kaihruaitu Cardinal Pierbattista Pizzaballa in khal biaknak lam hruaitu pawl le Diocese aiawh in a riahsiat thu a langter ih sualnak nei lo mipi pawl sunnak cu a rak zen ih a rak mawthluk. Nunnak cemtu nunau pahnih ih ruakvuinak cu zarhte ni ah Gaza ih Saint Porphyrius Church ah tuah a si ih an mai mual liamnak ruangah thla a rak cam sak.
Isareal ralkap in a cui donak cu Hamas’s pawl kom ih thupeknak center lole hotu an batnak ih an donak a si thu khal an sim. Cumi ah Gaza hmun ih Pawlpi cu Fr Romanelli le Missionaries of Charity Sister pawl ih hoha nakin him zetin um dingah umnak neilo in inn le Lo tan tu zalenglo an um bet rero thu khal theih a si.
October 7, ni ih thilcang mi kumkimni hlanah Italy thuthang Republica thawn an tonawknak ah Cardinal Pizzaballa in Isareal le Palestine pahnih cu cui thilcang ih tuarnak pawl kha pehbet in an tuar thu a rak sim. Kanmah pawl cu cui ni kan lan thei lo. Isareal le Palestine kaphnih in tuah thei lo mi thinlung ah thinnat nak an tuar rero lai a si tiah a rak sim. “Cawl tlang uh si” tin ti dingah duhnak thinlung cu hmuh a si hrih lo” tiah a mah in a rak sim. Ralbuainak rohtuk cu a mal thlang nan nitin nunram le minung zawnruahnak dinhmun pawl a besia thei thu Cardinal in ralrinnak a rak pe.
Hi mi thuthang cu Vatican thuthangin a tawi zawngin kan ngan mi a si.
October 6, 2026
Crd: Vatican News
