RVA Falam Service// October 12, 2026
Pope Leo XIV cun Zarhpini Angelus thlacamnak hmun ah, Jesu in thitumnak puai tahthim mi thu vun ruat in, theithiam awk lo nak a um hman ah Khristian lungawinak cun midang thawn tawm aw ding in in cak ter a si a ti.
Pope Leo cun tuini Gospel (Mt 22:1–14) sung ta siar mi Jesuh cun Siangpahrang pa in a fapa thitumnak hrang ih a timlam dan tahthimnak thu a rel. A thusimnak ah, Pope cun St. Thomas ih tongkam “thatnak cu a sinak vek in a darh aw theu,”(Bonum dicitur diffusivum sui) ti mi a sim.
Hi thuanthu sung ih siangpahrang pa vek in kan ni khal kan nuamnak kha midang thawn nuamtlang kan duh ve theu. A sinan Jesuh ih tahthimnak ah siangpahrang pa cun lungawinak a ngah fuh lo thu a khih hmuh. “Mi hrek cun mi hnaihnok an ti ih siangpahrang ih palai pawl an thah,” tiah Pope in a sim. “Riahsiat thlak, hi vek kan par ah a thleng ve thei, ziangahtile kan tuah ding mi thatnak cu theihthiam le lawmnak a si ringring lo ruangah a si.
Asinan, kan ni khal hnongnak kan ton tik ah beidong lo ten kan tumtah mi pawl kan tuahsuak ding ih, siangpahrang pa vek in kan lungawinak kha midang hnenah zem ve uh si.
Cule Pope Leo cun thuanthu sung ih mi thupi zetzet pawl cu zo an si timi thusuhnak pawl a tuah. Kum zabi 5 ih Bible zirhtu mi ropi St. Jerome cun siangpahrang cu vancung ih um mi kan Pa, mopa cu Jesu, monu cu kawhhran pi a si ti a hmusuak.
Kan ni khal Kawhhran sung tel kan si ih, kan nunnak khal midang le a mah Bawipai hrang ah hmang ding ah Pathian ih hril mi kan si ruang ah hi thuathu ah kan tel ve tiah a ti.
“Thitumnak puai cu kan mai ta a si ih puaituahnak hmun cu Biak inn le inn, kan umnak hmun pawl le siangpahrang ih fapa Jesuh Khrih cun kan par ah a duhdawtnak cu a phuang ih kan mah lam ih “Aw” ti ding lawng kha in hngaknak hmun pawl an si tiah a sim.
A netabik ah, Pope Leo cun Khristian lungawinak cu a lem(tuahcop mi) a si lo” a thukmi, a hnget mi le a dik mi” a si tiah a sim. Kan lungawinak cu “kan ton mi pawl ih hmel vek in a mawi. Cu mi cun kan ni hman mi a khahsil ter tu hnatuan, hnihsuah, mithhli pawl, kutkaih cibaiawk nak le duhdawtnak hnatuan pawl vek in a dik mi a si. Cu mi cu leitlun rundamnak hrang ah Pathian ih laksawng thluahsuah pakhat a si tiah a sim.
Hi mi cu Vatican news ih tar mi sung in kan ngan mi a si
October 11, 2026
