RVA Falam Service, September 4, 2026

Pope Leo XIV nak in Molfetta khua ih Pius XI nak tlawngih a um tu tlawngta (Seminarians) pawl le Aversa khua ih um Episcopal tlawng ih um Italian tlawngta pawl thawi an tongawk caan ih tha a pek nak tongkam a si.

Cazirnak, daan thlunnak le a dotdot ih zirnak pawl cu Puithiam can nak ding hrangah a thupi konan Pathian thawi pawlkomnak parah hrambun dingtin hleice in a rak sim.

Pope in Marku cathianghlim sungta hrambun in “Khrih ih kawhnak cu kan maih thatnak ruangah siloin Pathian in in duhdawt ruangih a lak ih kan ngah mi thluasuah a si thu ralringnak a rak pek.


 Pawlpi zate hrangih ruahsannak khuatleu

Puithiam cang dingmi tlawngta pawl an um cu “Pawlpi hrangah ruahsannak hminsinnak” asi tin a rak ti ih zuamawknak tammi tuisan leitlunah thudik theihthiam thei dingih a dotdot ih zirnak cu a thu tuk mi a si thu hleice in a rak sim.

Pawlkom lakah zumtlangnak Puithiam cannak ding lamtluan cu mah pakhat te lawngih fehnak ding lamzin a si lo. Puithiam cang ding mi tlawngta pawl cu pawlkom (Community) ih nomnak/mawinak kha theithiam in nunramah hmang dingih kawhnak co tu an si. 

Tlang ihsin tumnak

Puithiam cannak ding tlawng ih zirnak cu thup aw ih um ringring ding a si lo. Puithiam cang ding mi tlawngta pawl cu an ngah mi thlaraulam thawn pehpar mi le Jesuh khrih ih thuthangtha kha minung pawl hnen simbet dingah Tirhthlah pawl vekin “Tlang ihsin an tum” a tul a si. Pope Leo XIV in Puithiam cang tu ding tlawngta (Seminarians) pawl kha Pawlpi aiawhin hlunghlai zetin a lungawi thu a sim ih a thusim a cem ter a si.

Hi mi thuthang cu Vatican thuthang in kan ngah mi a si.

September 3, 2026